‘राप्रपाले जनतालाई धोका दियो, अब राजसंस्था र हिन्दु राष्ट्रको एजेन्डा जय नेपाल पार्टीले रेस्क्यु गर्छ’ : डा. धवलशमशेर राणा (अन्तवार्ता)

–देशमा यति धेरै पार्टीहरु छन्, राजावादी पनि छन् । तपाईंको ‘जय नेपाल पार्टी’ किन चाहियो ?

प्रष्टै छ नि ! नेपाललाई पुनः हिन्दु अधिराज्य बनाउनुपर्छ भन्ने नेपाली जनताको चाहना हो । यो चाहना कसले यथार्थ बनाइदिने भन्ने हो । अहिलेसम्म राप्रपाले गर्नुपर्ने थियो, राप्रपाले गरेन ।

नेतृत्वको खाने दाँत र देखाउँने दाँत अलग–अलग देखियो । त्यसैले त्यो एजेन्डा जोगाउन र पुनः.स्थापित गर्न जय नेपाल पार्टी बनेको हो ।

–राप्रपामा बसेर सुधार नगर्ने, मैदान छोडेर आरोपित गर्नु उचित हुन्छ ?

यो मेरो आरोप होइन । मसहित आम नेपालीको अनुभूति हो कि राप्रपाको पटक–पटकको नेतृत्वले देखाउने एउटा गर्ने अर्कै गरे ।

नेपाली जनताले त दुई/तीन पटक राप्रपालाई ठाउँमा पुर्‍याएकै हो नि ! भोट दिएर ठाउँमा पुर्‍याएपछि नेपाली जनतालाई धोका दिएर सत्ताको चास्नीमा हराएको कुरा सत्य होइन र ?

–यत्रो समय बिताएको पार्टीबाट अलग हुने निर्णयमा कसरी पुग्नुभयो ?

गएको चुनावमा ९७ प्रतिशत उमेदवारको जमानत जफत भएपछि हाम्रो एजेन्डा नै धरापमा पर्‍यो भन्ने निष्कर्ष निकालियो ।

त्यहाँभित्रको अनियमितता र उकुसमुकस तथा झगडाको कुरा आफ्नै ठाउँमा छ ।

तर, एजेन्डा नै समाप्त हुन लागेपछि सनातन हिन्दु राष्ट्र र राजसंस्थासहितको प्रजातन्त्रको एजेन्डालाई ‘रेस्क्यू’ गर्नका लागि हामी राप्रपाबाट बाहिर निस्किएका हौँ ।

–तपाईंहरुले देखेको अवको व्यवस्था कस्तो हो ?

हामी प्रस्ट छौं । संवैधानिक राजा, नेपालीका छोराछोरीले राजनीति गर्ने हो । राजाले राजनीति गर्ने होइन । राजसंस्था अविभावकीय भूमिका र घरमुली, एउटा अन्तिम रक्षकको रुपमा यो देशलाई चाहिन्छ ।

प्रजातन्त्र चाहिन्छ, राजनीतिक पार्टीहरु चाहिन्छन् । हिन्दु सापेक्ष सनातन हिन्दु अधिराज्य भनेका छौँ ।

–त्यतिमात्रै हुन् एजेन्डा ?

आर्थिक उन्नतिको पनि यो पार्टीको ठूलो योजना छ । यो राष्ट्रलाई एउटा समृद्ध राष्ट्र बनाउन सक्ने स्रोत साधन र भूउपयोग, भू–राजनीतिक र भौगोलिक अवस्थितिमा सुझबुझ पुर्‍याउन सक्ने र राष्ट्रप्रति इमान्दार नेतृत्वसहितको पार्टी आयो भने यो राष्ट्र समृद्ध राष्ट्र बन्न सक्ने सम्भावना छ ।

–यो पार्टीले राजा र राजा मान्ने परम्परागत शक्ति बाहेक जनताको कुन तप्कालाई प्रतिनिधित्व गर्छ ?

सनातन धर्मका पक्षधरहरु, राजसंस्था चाहनेहरु, भ्रष्टाचारविरुद्ध उभिनेहरु, संघीयता र गणतन्त्रका विपक्षीसहित सबै स्वाभिमानी नेपालीहरूलाई ‘जय नेपाल पार्टी’ले प्रतिनिधित्व गर्छ ।

–प्राप्तिको बाटो के हो ?

हामी बन्दुक उठाएर जंगल जाँदैनौं । मारकाट गरेर यसलाई फिर्ता गर्ने पनि होइन । यसका दुईवटा बाटो छन् – एउटा जनताको म्यान्डेट लिएर सदनबाट, अर्को जनताकै सहभागितामा सडकको शान्तिपूर्ण जनआन्दोलनबाट । प्राथमिकता भनेको प्रणालीलाई नै प्रयोग गरेर हाम्रो एजेन्डा, हाम्रो माग र हाम्रो आस्था पुनस्र्थापित गर्ने हो ।

–एकदमै छोटो आन्दोलनले परिवर्तन हुन्छ, त्यसका लागि केही दिन नभएर केही घण्टामै परिवर्तन हुन्छ भन्ने जेनजी आन्दोलनको निकट विगत छ । तपाईंहरु त्यसबाट प्रभावित हुनुहुन्छ ?

हामी नेपालीले नेपालीलाई मार्ने, काट्ने, कुटने, लुट्ने, र देशका आगो लगाउने तथा निजी तथा सरकारी सम्पत्ति ध्वस्त पार्ने पक्षधर होइनौं । अदालत जलाएर आत्मतुष्टि गर्नेहरुसँग हाम्रो तुलना नगरिदिनुहोला ।

–यो पार्टीमा देखिने पात्र तपार्ईं धवलशमशेर र दुर्गा प्रसाईं, यसको ‘व्याकअप’मा पूर्वराजा ज्ञानेन्द्र शाह हुन् ?

तमाम व्यक्तिहरु यसमा जोडिन खोजेका छन् । विभिन्न पार्टीमा काम गरिरहेकाहरुले यो पार्टीमा जोडिने इच्छा राखिरहेका छन् । यो पार्टीले आकार लिँदै गर्दा को–को यसमा जोडिन्छन् भन्ने तपाईंहरुले देखिहाल्नुहुनेछ । यो पार्टी राप्रपा छोडेकाहरुको मात्र बन्नै छैन ।

हामीले सनातन हिन्दु राष्ट्र र संवैधानिक राजासहितको प्रजातन्त्रको मुद्दा अघि सारेको हुँदा राजाबाट हामीप्रति सदभाव रहन्छ नै ।

–दुर्गा प्रसाईंले त राजा बन्न मन भए हामीसँगै सडकमा आउनुपर्छ भन्नुभएको थियो । तपाईंले पूर्वराजाको संलग्नता छैन भन्दा मानिसले पत्याउँछन् ?

कुन समयमा दुर्गाजीले के बोल्नु भयो त्यसको अर्थ हुन्न । अब यो पार्टीमा आइसकेपछि उहाँ यो पार्टीको विचार, सिद्धान्त र उद्देश्य हासिल गर्न लाग्नु हुनेछ । यो पार्टी प्रजातान्त्रिक प्रणालीमा चल्ने पार्टी हो ।

–तर दुर्गा प्रसाईंका बारेको टिप्पणी सुन्नुभएको छ ?

कसले के टिप्पणी गर्छन् त्यतातिर म जान चाहन्न । उहाँले बैंकबाट ऋण लिएर ठूलो हस्पिटल, क्यान्सर हस्पिटल, फाइभस्टार होटल, विद्यालय बनाउनुभएको छ, बनिरहेका पनि छन् ।

उहाँले हरेक तीन महिनामा ऋणको किस्ता बुझाएर सार्वजनिक पनि गरेको तपाईंले पनि देख्नुभएको होला ।

–तपाईं एउटा धर्मको देश बनाएर बाँकी धर्म र सम्प्रदायको सम्मान कसरी गर्नसक्नु हुन्छ ?

यसको उदाहरण मैले दुई दुईपटक निर्वाचित भएर काम गरेको नेपालगञ्ज गएर हेर्न सक्नुहुन्छ । त्यहाँ हरेक जाति जनजातिहरुको साथ थियो, सबै राजनीतिक दलहरुले साथ दिएका थिए ।

म एउटा सानो पार्टीबाट प्रतिनिधित्व गर्दै गर्दा पनि जनताले पत्याएको व्यक्ति हुँ । कुनै भ्रष्टाचार थिएन । अनि सबै धर्मको सम्मान रहेको सनातन हिन्दु राष्ट्र बनाएर विश्वमा एउटा समृद्ध राष्ट्र पनि बनाउन सकिन्छ भन्ने मेरो दृढ विश्वास छ ।

–यो पार्टी सञ्चालनको स्रोत के हो ?

यो एकदमै राम्रो प्रश्न सोध्नुभयो । हरेक राजनीतिक पार्टी सञ्चालनका लागि स्रोत आवश्यक हुन्छ र त्यो पारदर्शी हुनु पर्छ । यो प्रश्न नेपालका हरेक पार्टीलाई सोधिनु पर्छ ।

‘जय नेपाल पार्टी’ संचालनको स्रोत विश्वभरका सनातन हिन्दु राष्ट्र नेपाल देख्न चाहने आस्थावान व्यक्तिहरु हुन् । जसले हाम्रो पार्टीलाई स्वःस्फूर्त रुपमा गर्ने सहयोग हाम्रो पार्टीको मुख्य स्रोत हो । हामी त्यसलाई पारदर्शीतासहित उपयोग गर्नेछौँ ।

पहिले कमल थापासँग रहनुभयो, त्यसपछि राजेन्द्र लिङ्देनसँग । अहिले फेरि आफैँ अघि सर्नुभयो । राजेन्द्र लिङ्देनलाई हटाउन नसकेपछि आफैँ हट्नुभयो भन्छन् नि !

कमल थापालाई स्थापित गरेको सत्य हो । त्यसबेला राप्रपाले राजसंस्थाको मुद्दा छोडेपछि कमल दाइले राजसंस्था र हिन्दु राष्ट्रको एजेन्डा बोक्नुभयो, उहाँले हिम्मत देखाएपछि राप्रपा नेपालमा उहाँलाई साथ दिएकै हुँ । उहाँलाई शक्तिशाली बनाउन भूमिका खेलेकै हुँ ।

मैले उहाँको महामन्त्री र उपाध्यक्ष भएर काम गरेकै थिएँ । तर, जनताले विश्वास गरेर २५ सिट दिए । उहाँले जनतालाई नै धोका दिनुभयो । उहाँ गणतन्त्र ल्याउन निर्णायक भूमिका खेलेका प्रचण्ड नेतृत्वको सरकारमा उपप्रधानमन्त्री बन्न गएर राप्रपा नेपाललाई ध्वस्त पार्नुभयो ।

त्यसपछि मैले लिङ्देनजीलाई नेतृत्वमा पुर्‍याएको हुँ । तर, पछिल्लो पटक जनताले दिएको विश्वास सत्तामै मिसाएर उहाँले पनि ध्वस्त पार्नुभयो ।

पार्टीमा पटक–पटक महाधिवेशनको मिति तोक्दै सार्ने र टार्ने अभियानबाट आफूलाई जोगाउने खेल खेल्नुभयो । तर, चुनावबाट एजेन्डा नै ध्वस्त हुने अवस्था देखेपछि रेस्क्युका लागि मैले यो बाटो रोजेको हुँ । त्यहाँको आन्तरिक लोकतन्त्रबारे अब म टिप्पणी गर्न चाहन्न । तस्बिर– हरिशजंग क्षेत्री/वार्हखरीबाट