चीसो बढेपछि बुटवल उपमहानगर भित्रका विद्यालय तीन दिन बन्द

काठमाण्डौंः अत्यधिक चीसो बढेपछि बुटवल उपमहानगरपालिकाले आजदेखि तीन दिन विद्यालयहरु बन्द गराएको छ ।

चीसोका कारण बालबालिकाको स्वास्थ्यमा प्रतिकूल असर पर्ने संभावनालाई मध्यनजर गरी माघ ७ देखि ९ गतेसम्म तीन दिन विद्यालयमा जाडो विदा दिने निर्णय गरेको उपमहानगरपालिका प्रमुख प्रशासकीय अधिकृत मित्रमणि खनालले जानकारी दिनुभयो । उपमहानगर भित्रका ३४ सामुदायिक, ५९ वटा संस्थागत,५ धार्मिक र ९ वटा मन्टेश्वरी सहित सबै विद्यालयमा माघ ७ गतेदेखि ९ गतेसम्म विदा दिइएको खनालले बताउनुभयो ।

बुटवलमा पुर्व प्राथमिक तहदेखि कक्षा १२ सम्म ६७ हजार २ सय ५६ जना विद्यार्थी अध्ययनरत छन ।

बुटवलले जाडो विदा दिएपनि रुपन्देहीका अन्य पालिकामा जाडो विदा नदिइंदा चीसोले विद्यार्थीको स्वास्थ्यमा प्रतिकूल असर पर्ने र पठन पाठन प्रभावकारी नहुने अवस्था भएपनि अन्य पालिकाले विदा नदिएकोमा अभिभावकले गुनासो गरेका छन् ।