गुल्मीमा विद्यार्थीको आँखा परीक्षण गरिने

तम्घास (गुल्मी), वैशाख १३ गते । गुल्मीमा आगामी जेठ १५ गतेसम्म सबै विद्यार्थीको आँखा परीक्षण गरिने भएको छ । नेपाल नेत्र ज्योती सङ्घ जिल्ला शाखाको बैठकले जिल्लाका सबै विद्यालयका विद्यार्थीको आँखा परीक्षण गर्ने निर्णय गरेको हो ।

आँखा परीक्षण गर्न प्रत्येक विद्यालयका एक एक शिक्षकलाई तालिम प्रदान गरिने नेत्र ज्योति सङ्घका जिल्ला सचिव पदमप्रसाद पाण्डेले जानकारी दिनुभयो । पालिकासँग समन्वय गरेर यही वैशाख २५ गतेसम्म शिक्षकलाई तालिम दिइने छ । जिल्लाका सामुदायिक एवम् संस्थागत विद्यालयमा अध्ययन गर्ने कक्षा १२ सम्मका विद्यार्थीको आँखा परीक्षण गरिने छ ।

“समस्या पहिचानपछि नजिकको आँखा उपचार केन्द्रमा रिफर गरिने छ । शल्यक्रिया गर्नुपर्ने भए जिल्ला आँखा उपचार केन्द्रमा उपचार गरिने छ”, सचिव पाण्डेले भन्नुभयो । इस्मा, रेसुङ्गा, गुल्मीदरबार, छत्रकोट र रुरुक्षेत्र पालिकाका नागरिकको मोतियाबिन्दुको निःशुल्क शल्यक्रिया गरिने छ ।

त्योभन्दा बाहेकको सम्बन्धित पालिकासँग समन्वय गरेर उपचार गरिने उहाँले बताउनुभयो । जिल्ला आँखा उपचार केन्द्र, गुल्मीले गरेको एक सर्वेअनुसार गुल्मीमा कूल तीन हजार पाँच सय ४३ जनामा मोतियाबिन्दुको समस्या देखिएको छ । सात सय नौ जनाको शल्यक्रिया गर्नुपर्ने अवस्था छ । रासस