यातायात व्यवसायीलाई सहुलियत दिने व्यवस्था मिलाउः विकास तथा प्रविधि समिति

काठमाण्डौः प्रतिनिधि सभाको विकास तथा प्रविधि समितिले सार्वजनिक यातायात व्यवसायीलाई सहुलियत दिने व्यवस्था मिलाउन सरकारलाई निर्देशन दिएको छ ।

बिहीबार संसद सचिवालयको सभाहल सिंहदरबारमा बसेको समितिको बैठकले स्मार्ट लाइसेन्स र यातायात व्यवस्थापन सम्बन्धमा गरेको छलफलमा कोरोना भाइरसको कारण समस्यामा परेका यातायात व्यवसायीहरुलाई राहत तथा सहुलियत उपलब्ध गराउन निर्देशन दिएको हो ।

समितिकि सभापति कल्याणीकुमारी खड्काले कोभिड-१९ को प्रभावको कारण सिर्जित समस्याले लगानी डुब्ने खतरा बढेकोले व्यवसायीहरुलाई सहुलियत प्रदान गर्न, बैंक ऋणको पुनर्तालिकीकरण गर्न र पुनर्कर्जा उपलब्ध गराउने विषयमा नीतिगत व्यवस्था गरी कार्यान्वयन गर्न भौतिक पूर्वाधार तथा यातायात मन्त्रालय र यातायात व्यवस्था विभागलाई निर्देशन दिइएको बताइन् ।

समितिले यातायात व्यवस्था विभागमा जनशक्ति अपर्याप्त भइ कामको चापलाई समयमै सम्पन्न गर्न कठिनाइ भएकाले विभागको गठन तथा व्यवस्थापन सर्भे गरी आवश्यक परिपूर्ति गर्न, कामलाई तत्काल अगाडि बढाउनसमेत मन्त्रालयलाई निर्देशन दिएको छ । काठमाण्डौ उपत्यकासहित प्रमुख शहरहरुमा प्रवेश गर्ने गाडीलाई धुलोमुक्त गरेर मात्र प्रवेश गर्न दिने व्यवस्था मिलाउन पनि समितिले निर्देशन दिएको सभापति खडकाले बताइन् ।

समितिले लाइसेन्स प्रणालीलाई प्रभावकारी र व्यवस्थित गर्न, निजी सवारी साधनको लाइसेन्स वाहकलाई सार्वजनिक गाडी सञ्चालन गर्न नपाउने गरी छुट्टाछुट्टै मापदण्ड तयार गरी कार्यान्वयन गर्नसमेत मन्त्रालयलाई निर्देशन दिएको छ ।

यस्तै कोभिड-१९को संक्रमणको अवस्थामा सार्वजनिक यातायात सञ्चालनको ठोस योजना बनाइ कर्यान्वयन गर्न र त्यस कार्ययोजना समितिलाई उपलब्ध गराउन समेत समितिले मन्त्रालय र विभागलाई निर्देशन दिएको छ ।