प्रधानमन्त्रीको दुत बनेर नेम्वाङले भेटे देउवालाई

काठमाण्डौः सत्तारूढ नेपाल कम्युनिष्ट पार्टी संसदीय दलका उपनेता एंव स्थायी समिति सदस्य सुवास नेम्वाङले प्रमुख प्रतिपक्षी नेपाली कांग्रेसका सभापति शेरबहादुर देउवालाई भेटेका छन्।

प्रधानमन्त्री केपी शर्मा ओलीको आग्रहअनुसार प्रधानमन्त्रीकै अनुमतिमा आफूले आइतबार बिहान सभापति देउवालाई भेटेको नेम्वाङले बताएका छन।

भेटमा आफूले समसामयिक राजनीतिक घटनाक्रमबारे प्रमुख प्रतिपक्षी दलका नेता देउवालाई जानकारी गराएको नेम्वाङको भनाइ छ। प्रधानमन्त्रीको आग्रहमा देउवासँग कुराकानी गरेको नेम्वाङले बताएका छन ।

देउवासंगको भेटमा आफूले वर्तमान समसामयिक राजनीतिक कुराकानीबारे जानकारी गराएको उनको भनाइ छ। प्रधानमन्त्रीजीलाई भन्नुपर्ने केही भए राख्न आफूले देउवालाई आग्रह गरेको पनि नेम्वाङको भनाइ छ। जवाफमा देउवाले तपाईहरुको विवाद आन्तरिक हो विवाद चाँडो टुंगोमा पुगोस्, शुभकामना छ भनेको बताईएको छ ।

सो  भेटमा सभापति देउवाले संवैधानिक परिषदका बाँकी नियुक्ति प्रक्रिया, एमसिसी, संविधानका मर्मविपरीत आएका एकपछि अर्का विधेयकहरू लगायतमा छलफल गरी अगाडि बढ्नुपर्ने धारणा राखेका थिए।

देउवासंग यसअघि प्रधानमन्त्री ओली र कांग्रेस सभापति देउवाबीच असार १७ गते भेट भएको थियो।