प्याब्सनले मङ्सिर दोस्रो साता अन्तर्राष्ट्रिय शैक्षिक सम्मेलन आयोजना गर्ने

काठमाण्डौँ, ६ कात्तिक। निजी तथा आवासीय विद्यालय अर्गनाइजेसन (प्याब्सन) ले  मङ्सिर १४ र १५ गते तेस्रो प्याब्सन अन्तर्राष्ट्रिय शैक्षिक सम्मेलन आयोजना गर्ने भएको छ ।

सोमबार राजधानीमा पत्रकार सम्मेलन गरेर प्याब्सनले  यसबारेमा जानकारी दिएको हो । सम्मेलनमा भुटान, पाकिस्तान, बङ्गलादेश, श्रीलङ्का, भारत र भियतनामबाट सहभागिताका लागि निश्चित भएको प्याब्सनले जनाएको छ ।

सम्मेलनका मुख्य उद्देश्यहरूमा विद्यालयको स्तर उन्नति, कक्षा कोठाको सुधार, शैक्षिक नेतृत्वको विकास र शिक्षक–विद्यार्थीको शैक्षिक गतिविधिलाई कसरी प्रभावकारी बनाउने भन्ने विषयमा गहन छलफल गरिने प्याब्सनका अध्यक्ष डिके ढुङ्गानाले जानकारी दिनुभयो ।

सम्मेलन शिक्षा क्षेत्रका अग्रणी व्यक्तित्वहरू, विद्यालयका संस्थापक प्रिन्सिपल, शैक्षिक निर्देशक र अग्रणी शिक्षकहरूप्रति लक्षित हुनेछ । दुई दिनसम्म चल्ने यस सम्मेलनमा १२ भन्दा बढी सेसनहरू हुनेछन् ।

जसमा विविध शैक्षिक विषयका छलफल, नीतिगत बहस, र विद्यालय सुधारका लागि प्रभावकारी उपायहरूको खोजी गरिनेछ । यसका साथै, विद्यालय व्यवस्थापन, शिक्षक प्रशिक्षण, र शैक्षिक नेतृत्वको सुदृढीकरणमा महत्त्वपूर्ण सुझावहरू प्रस्तुत गरिनेछन् ।