सूचनाको हक सबै नागरिकको कानुनी अधिकार : प्रमुख आयुक्त आचार्य

काठमाण्डौंः राष्ट्रिय सूचना आयोगका प्रमुख आयुक्त डा. सुरेश आचार्यले कानुनी प्रावधानअनुसार नागरिकलाई सहज रूपमा सूचना उपलब्ध गराउनु पर्नेमा जोड दिएका छन्।

सुनकोसी गाउँपालिकामा राष्ट्रिय सूचना आयोगद्वारा आयोजित स्थानीय तहसँग सूचना अधिकारसम्बन्धी अन्तरक्रिया कार्यक्रमलाई सम्बोधन गर्दै प्रमुख आयुक्त आचार्यले जनताको मागअनुसार सूचना उपलब्ध नगराउने कार्य अस्वीकार्य रहेको बताए।

‘सूचनाको हक सबै नागरिकको कानुनी अधिकार हो र यसअनुसार स्थानीय तह तथा सार्वजनिक निकायहरूले नागरिकलाई सहज रूपमा सूचना उपलब्ध गराउनु पर्छ।’ उनले भने।

आचार्यले मागबमोजिमको सूचना नदिए कारबाही गर्ने चेतावनी समेत दिए। ‘नियम अनुसार सूचना माग भए जोकोहीलाई सूचना दिनुपर्छ, सूचना लिने व्यक्तिले पनि सूचनाको गलत प्रयोग गरे कारबाही हुन्छ।’ उनले भने।

प्रमुख आयुक्तले प्रत्येक कार्यालयमा दोस्रो वा तेस्रो श्रेणीका कर्मचारीलाई सूचना अधिकारी तोक्नुपर्ने आवश्यकता औंल्याए। ‘सूचना अधिकारीलाई तोक्नु कार्यालयको दायित्व हो,’ उनले भने।

सुनकोसी गाउँपालिकाका अध्यक्ष दीपा बोहोरा दाहालले कार्यक्रमको महत्त्व उल्लेख गर्दै भने ‘हामीले माग गरिएका सूचना नियमअनुसार सहजै उपलब्ध गराएका छौँ। यद्यपि केही व्यक्तिहरू गलत उद्देश्यले सूचना माग्ने गर्दछन्, तर हामीले असल नियतका साथ सूचना उपलब्ध गराएका छौँ।’

कार्यक्रममा उपस्थित सिन्धुली क्षेत्र नं-२ का सङ्घीय सांसद लेखनाथ दाहालले सूचना आयोगको सचेतना र अन्तरक्रिया कार्यक्रमहरू सबै स्थानीय तहमा सञ्चालन गर्नुपर्ने कुरा उठाए। उनले भने, ‘सूचनाको सही प्रयोगले ज्ञानको वृद्धि गर्छ र सबै नागरिकलाई सूचना राख्नको महत्त्व बुझाउनु आवश्यक छ।’