लायन्स हेरिटेज धरहराको स्वास्थ्य शिविर सम्पन्न

काठमाण्डौं, १९ फाल्गुन । विश्वभर सामाजिक सेवामा अग्रणी स्थानमा रहेको लायन्स क्लब इन्टरनेशनलको नेपालस्थित डिस्ट्रिक्ट ३२५ के नेपाल अन्तर्गतको ‘लायन्स क्लब अफ काठमाडौं हेरिटेज धरहराको बृहत निशुल्क स्वास्थ्य शिविर सम्पन्न भएको छ ।

सोमबार नेपालटारस्थित ग्रामीण आदर्श बहुमुखी क्याम्पस प्राङ्गणमा लियो क्लब अफ काठमाण्डौं जाउलाखेल फ्रेन्डस्को सहकार्यमा एक दिने निःशुल्क स्वास्थ्य शिविर सम्पन्न गरेको हो ।

निशुल्क स्वास्थ्य शिविरमा १७२ जनाले आँखा तथा २ सय ५ जनाले दाँत परीक्षण गराएर स्वास्थ्य लाभ लिएका थिए । उक्त शिविरमा ६८ जनाले रक्तदान कार्यक्रममा सहभागी हुँदा ६८ पिन्ट रगत सङ्कलन भएको  आयोजक क्लबका अध्यक्ष भुपेन्द्र सिलवालले बताए । लायन्सको निशुल्क स्वास्थ्य शिविरका कारण स्थानीय रक्त सञ्चारलाई ठूलो मद्दत पुर्‍याएको लायन्स अन्तराष्ट्रिय डिस्ट्रिक्ट ३२५ के नेपालकी रिजन चियरपर्शन सुष्मा भण्डारीले बताइन् ।

क्लबका अध्यक्ष भूपेन्द्र सिलवाल ‘टाइसन’ले स्थानीय समुदायको स्वास्थ्य सचेतना र स्वास्थ्य सेवामा पहुँच वृद्धि गर्न शिविरले महत्त्वपूर्ण भूमिका खेलेको बताए । उनले यस प्रकारका कार्यक्रमहरूले उच्च शिक्षालयमा सकारात्मक प्रभाव पार्ने विश्वास पनि व्यक्त गरे ।

यस स्वास्थ्य शिविरमा सहभागीहरूमध्ये धेरैले स्वास्थ्यसम्बन्धी परामर्श पनि पाएका थिए, जसले उनीहरूलाई आफ्नो स्वास्थ्यको ध्यान राख्न प्रोत्साहित गरेको छ । लायन्स क्लबले आगामी दिनहरूमा पनि यस्ता सामाजिक कार्यहरूलाई निरन्तरता दिने र समुदायको सेवा गर्ने  प्रतिबद्धता जनाइन् ।

उक्त शिविरमा लियो क्लब अफ काठमाण्डौं जाउलाखेल फ्रेण्डस तारकेश्वर क्लब ६०ले सहआयोजना गरेका थिए भने ग्राण्डी अन्तराष्ट्रिय अस्पताल, ॐ समाज डेण्टल अस्पताल र किर्तिपूर आँखा अस्पतालले प्राविधिक सहयोग गरेका थिए । रक्तदान दिने दातालाई लायन्स क्लबले प्रमाणपत्र समेत उपलब्ध गराएको थियो ।