श्रावण २०, २०८३ बुधबार
August 5, 2026
युग खबर
२०८१ चैत्र २४, आइतबार
काठमाडौँ, २४ चैत : अस्पतालमा हुने सङ्क्रमण रोकथाम तथा नियन्त्रणका लागि अस्पतालमा कार्यरत नर्सहरुलाई तालिम प्रदान गरिएको छ ।
‘इन्फेक्सन कन्ट्रोल सोसाइटी अफ नेपाल (आइसिएसओएन)’ले ग्राण्डी अस्पतालसँगको सहकार्यमा उपत्यकाका विभिन्न अस्पतालमा कार्यरत नर्सहरुलाई दुई महिने तालिम प्रदान गरेको हो ।
दुई महिने तालिमको आज समापन कार्यक्रममा वरिष्ठ नर्स लालदेवी महर्जनले अस्पतालमा आउने बिरामीलाई सङ्क्रमण हुन नदिन यस्ता तालिमबाट सहयोग पुग्ने बताउनुभयो । उक्त तालिममा बिरामीलाई कस्तो कोठामा राख्ने, हावा कस्तो हुने, कस्तो सामान प्रयोग गर्दा सङ्क्रमण कम हुन्छलगायत बारेमा जानकारी गराइएको थियो ।
इन्फेक्सन कन्ट्रोल सोसाइटी अफ नेपालकी उपाध्यक्ष प्रमिला श्रेष्ठले तालिममा स्वास्थ्य संस्था सम्बद्ध सङ्क्रमण रोकथाम र नियन्त्रणका क्षेत्रमा शिक्षा, सचेतना, अध्ययन–अनुसन्धान तथा सहकार्यको क्षेत्रमा सोसाइटीले काम गर्दैआएको बताउनुभयो ।
सन् २०२० मा स्थापना भएको उक्त सोसाइटीले हालसम्म देशभरका विभिन्न अस्पतालमा कार्यरत ११३ नर्सहहरुलाई सङ्क्रमण रोकथामसम्बन्धी तालिम प्रदान गरिसकेको छ । आज सम्पन्न भएको पाँचौँ सङ्क्रमण रोकथाम तालिममा देशभरका विभिन्न अस्पतालमा कार्यरत १६ नर्सको सहभागिता रहेको थियो । नेपाल सरकारले सञ्चालन गर्ने हरेक सङ्क्रमण रोकथाम तथा नियन्त्रणसम्बन्धी कार्यक्रममा सोसाइटीले भूमिका निर्वाह गर्दैआएको छ । रासस
युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया