कनकासुन्दरीमा निःशुल्क आँखा शिविर सम्पन्न

काठमाण्डौंः जुम्लाको कनकासुन्दरी गाउँपालिका–४ स्थित हाट सिँजा स्वास्थ्य चौकीमा निःशुल्क आँखा शिविर सम्पन्न भएको छ । शनिबार र आइतबार सञ्चालित सो दुईदिने आँखा शिविरमा ६०१ जनाले आँखा जाँच गराएका छन् ।

गाउँपालिकाको आर्थिक सहयोग, हिमालय आँखा अस्पताल पोखराको प्राविधिक सहयोग तथा कनकासुन्दरी गाउँपालिका स्वास्थ्य शाखाको समन्वयमा आयोजना गरिएको शिविर सञ्चालन गरिएको थियो ।

शिविरमा ४६ जनाको मोतियाविन्दुको शल्यक्रिया तथा ३०० जनालाई निःशुल्क चश्मा वितरण गरिएको कनकासुन्दरी गाउँपालिकाको स्वास्थ्य शाखाका स्वास्थ्य निरीक्षक वीरेन्द्रप्रसाद उपाध्यायले जानकारी दिनुभयो ।

प्रत्येक वर्ष यहाँ निःशुल्क आँखासम्बन्धी शिविर सञ्चालन गरिँदै आएको गाउँपालिका अध्यक्ष दामोदरप्रसाद आचार्यले बताउनुभयो । शिविरमा उपचारपछि बिरामीलाई घरसम्म पु¥याउने, खानबस्नको व्यवस्था तथा फलफूल प्रदान गरिएको गाउँपालिकाका प्रमुख प्रशासकीय अधिकृत दीपेन्द्र भण्डारीले जानकारी दिनुभयो । रासस