वार्ता सकिए पनि समाधान टाढा, सरकार र शिक्षकबीच सहमति भएन

काठमाण्डौं, १३ वैशाख । सरकारले आन्दोलनरत नेपाल शिक्षक महासंघसँग वार्ता गरे पनि सहमति हुन नसकेको छ। शिक्षामन्त्री रघुजी पन्तको उपस्थितिमा शिक्षा मन्त्रालयमा शनिबार बसेको वार्ता निष्कर्षविहीन टुंगिएको महासंघका अध्यक्ष लक्ष्मीकिशोर सुवेदीले जानकारी दिएका छन्।

सुवेदीका अनुसार वार्तामा कुनै ठोस सहमति नजुटेपनि छलफल र संवादलाई निरन्तरता दिने सहमति भएको छ। उनले भने, “छलफललाई निरन्तरता दिने कुरा भयो, दुई पक्षीय सहमतिका लागि फेरि बसेर संवाद अगाडि बढाउने निर्णय भएको छ।” तर अर्को बैठक कहिले बस्ने भन्ने विषयमा टुंगो लागेको छैन।

वार्तामा नेपाल विद्यालय कर्मचारी परिषद्का अध्यक्ष गंगाराम तिवारीले पनि सहभागिता जनाएका थिए। तिवारीले मन्त्रालयले शिक्षकहरूको माग र मुद्दाबारे यथेष्ट जानकारी दिएपछि मात्र समाधानतर्फ अघि बढ्न सकिने बताएका छन्।

वार्तामा महासंघले आफ्ना प्रमुख मागहरू मन्त्री पन्त समक्ष राखेको थियो। जवाफमा मन्त्री पन्तले शिक्षकहरूले उठाएका मागहरूलाई ध्यानपूर्वक सुनेर सकेसम्म मागहरू सम्बोधन गर्न प्रयास गर्ने प्रतिबद्धता व्यक्त गरेका छन्।

नयाँ शिक्षा ऐन तत्काल ल्याउनुपर्ने मागसहित नेपाल शिक्षक महासंघको नेतृत्वमा देशैभरिका शिक्षकहरू २५ दिनदेखि काठमाडौंमा आन्दोलनरत छन्। यद्यपि सरकारसँग वार्ता सुरु भए पनि महासंघले आन्दोलन यथावत् जारी रहने स्पष्ट पारेको छ।