लाखौंका लोकप्रिय समाजसेवीले मलामी पाएनन्

काठमण्डाैंः आधुनिक धुलिखेल नगरपालिका तथा धुलिखेल खानेपानी निर्माणका सफल परिकल्पनाकार मध्येका एक वरिष्ठ समाजसेवीको मंगलबार दुखद निधन भयो, तर उहाँले कुनै आफन्त मलामी पाउनुभएन ।

धुलिखेललाई काकाकुलको अवस्थाबाट मुक्ति दिलाउन जर्मन सहयोग नियोगसम्म पुगेर हारगुहार गर्ने समाजसेवी ९८ वर्षका हुनुहुन्थ्यो । मंगलबार राति २ बजेको समयमा उहाँ कोरोनासँग पौठेजोरी खेल्दाखेल्दै बित्नुभयो ।

उहाँको श्रावण २७ गते कृष्णजन्माष्टमीका दिन ९८ औं जन्मदिन मनाउने तयारी भैरहेको थियो । अन्य वर्षमा उहाँको जन्मदिनको अवसर पारी पारिवारिक प्रतिष्ठानबाट समाजमा उत्कृष्ट काम गर्ने व्यक्ति, संघ–संस्थालाई सम्मान गर्ने र विद्यार्थीलाई छात्रवृत्ति प्रदान गर्ने गर्नुहुन्थ्यो ।

उहाँलाई बचाउन धुलिखेल अस्पताल र परिवारले सक्दो प्रयास गर्यो । परिवारका सात सदस्यलाई उहाँकै सेवा गर्दागर्दै कोरोना भाइरस संक्रमण नै भयो । अरु दुई सदस्यलाई भने पहिला नै संक्रमण भएको थियो ।

विक्रम संवत् १९८० भाद्र १८ गते सोमबार श्रीकृष्ण जन्माष्टमीका दिन काभ्रेपलाञ्चोक जिल्लाको धुलिखेलमा जन्मेका उहाँ व्यापार–व्यवसायमा सफल हुनुहुन्थ्यो । साधारण लेखपढ मात्र गर्ने उहाँ महात्मा गान्धी, जवाहरलाल नेहरु, बी.पी.कोइराला र गणेशमान सिंहबाट प्रभावित हुनुहुन्थ्यो । उहाँका सबै सन्तान अहिले व्यापार व्यवसाय र समाजसेवामा नै सकृय छन् ।

काठमाडौं विश्व विद्यालयका संस्थापक उपकुलपति प्रा.डा. सुरेशराज शर्माले उहाँ एक प्रसिद्ध समाजसेवी र शिक्षा तथा स्वास्थ्य क्षेत्रमा धुलिखेलका लागि अति नै ठूलो योगदान पु¥याएका व्यक्ति हुनुहुन्थ्यो, कोरोना महामारीका कारण मलामी जाने अवस्थासम्म रहेन भनेर दुःख व्यक्त गर्नुभयो । नेपाल समाचारपत्र