कास्की । पोखरामा आज माघ ९ गतेदेखि ‘टाइगर कप’ राष्ट्रिय तथा अन्तर्राष्ट्रिय आमन्त्रित खुला क्लब च्याम्पियनसिप महिला तथा पुरुष भलिबल प्रतियोगिता सुरु हुँदैछ।
टाइगर ग्रुप अफ पोखराको आयोजनामा पोखरा रंगशालास्थित भलिबल कोर्टमा प्रतियोगिता सञ्चालन हुनेछ। आयोजकले पत्रकार सम्मेलन गर्दै प्रतियोगिताको सम्पूर्ण तयारी पूरा भएको जानकारी दिएको छ।
प्रतियोगितामा पुरुषतर्फ ६ टोली र महिलातर्फ ५ टोलीको सहभागिता रहनेछ। महिलातर्फ नेपाल पुलिस क्लब, त्रिभुवन आर्मी क्लब, एपिएफ क्लब, न्यू डायमण्ड युथ स्पोर्ट्स क्लब र थाइल्याण्ड क्विन्स (थाइल्याण्ड) ले प्रतिस्पर्धा गर्नेछन्।
पुरुषतर्फ नेपाल पुलिस क्लब, त्रिभुवन आर्मी क्लब, एपिएफ क्लब, पर्वत जिल्ला भलिबल संघ र माल्दिभ्स भलिबल एसोसिएसन सहभागी छन्।
आजको उद्घाटन खेलमा महिलातर्फ न्यू डायमण्ड र त्रिभुवन आर्मी क्लब आमनेसामने हुँदैछन् भने पुरुषतर्फ त्रिभुवन आर्मी क्लबले माल्दिभ्स भलिबल एसोसिएसनको सामना गर्नेछ।
माघ १७ गतेसम्म चल्ने प्रतियोगितामा विजेताले नगद रु ६ लाख ६६ हजार ६६६, उपविजेताले रु ३ लाख ६६ हजार ६६६ र तेस्रो हुने टोलीले रु १ लाख ६६ हजार ६६६ पुरस्कार प्राप्त गर्नेछन्।
युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया