लायन्स अन्तर्राष्ट्रिय जिल्ला ३२५ के नेपालको चौथो अधिवेशन शनिवार हुँदै

काठमाडौं, वैशाख ११ गते । लायन्स अन्तर्राष्ट्रिय जिल्ला ३२५ के (एमडी ३२५) नेपालको चौथो वार्षिक जिल्ला अधिवेशन शनिवार काठमाडौंमा आयोजना हुँदैछ। लायन्स क्लब अफ काठमाडौं गोंगबु, कोसेली, जागृति र गौरवको संयुक्त आयोजनामा काठमाडौंस्थित नेपाल प्रहरी क्लब, भृकुटीमण्डपमा हुने भएको हो ।

कार्यक्रम बिहान ८ बजेदेखि सुरु भई दिवंगत सदस्यप्रति श्रद्धाञ्जलि, विशिष्ट अतिथिहरूको आसन ग्रहण, राष्ट्रिय गान तथा झण्डा वन्दन, स्वागत मन्तव्य, सांस्कृतिक प्रस्तुति र दीप प्रज्वलनजस्ता कार्यक्रम हुनेछन्। त्यसपछि अधिवेशन प्रतिज्ञा, पुरस्कार तथा सम्मान वितरण, प्रमुख अतिथि र विशिष्ट अतिथिको मन्तव्य तथा धन्यवाद ज्ञापन कार्यक्रम तय गरिएको छ।

दिउँसो भोजनपछि हुने सत्रमा प्रतिवेदन प्रस्तुत तथा अनुमोदन, दोस्रो सत्रमा थप प्रतिवेदनमाथि छलफल तथा साँझ उम्मेदवार परिचय र निर्वाचन प्रक्रिया सञ्चालन गरिनेछ। त्यसपछि निर्वाचन परिणाम घोषणा तथा समापन समारोह आयोजना गरिने कार्यक्रम रहेको छ। अधिवेशनले जिल्ला नेतृत्व चयनसहित आगामी कार्यदिशा तय गर्ने अपेक्षा गरिएको छ। रासस