आईसीसी विश्वकप लिग–२ : आज नेपाल र अमेरिका भिड्दै

काठमाडौं । आईसीसी पुरुष क्रिकेट विश्वकप लिग–२ अन्तर्गत जारी त्रिकोणात्मक सिरिजको अन्तिम खेलमा आज नेपाल र अमेरिका भिड्दैछन् । कीर्तिपुरस्थित टियु क्रिकेट मैदानमा हुने खेल बिहान ९ः३० बजे शुरू हुनेछ ।

आजको खेलमा दुवै टोली जितसहित सिरिजको अन्त्य गर्ने लक्ष्यमा छन् । नेपाल लगातार तेस्रो जितको खोजीमा रहँदा अमेरिका अघिल्लो हारको बदला लिने योजनामा मैदान उत्रिनेछ ।

नेपालले सिरिजको पहिलो खेलमा स्कटल्याण्डसँग २ रनले पराजित हुँदै शुरुआत गरेको थियो । त्यसपछि दोस्रो खेलमा अमेरिकालाई ९ विकेट र तेस्रो खेलमा स्कटल्याण्डलाई ६ विकेटले हराउँदै लय समातेको छ । नेपाल आज अमेरिकामाथि लगातार दोस्रो जित निकाल्ने प्रयासमा हुनेछ ।

शीर्ष चारमा पुग्ने सम्भावना कायम राख्न नेपालका बाँकी ९ खेल महत्त्वपूर्ण मानिएका छन् । हाल नेपाल २७ खेलबाट २२ अंकसहित लिगको पाँचौं स्थानमा रहेको छ ।

यता अमेरिका समान २७ खेलबाट ३८ अंक जोड्दै शीर्ष स्थानमा छ । अमेरिकाले शुरुआती दुई खेलमा स्कटल्याण्डसँग २ रन र नेपालसँग ९ विकेटको हार बेहोरेको थियो । तर तेस्रो खेलमा स्कटल्याण्डलाई ६ विकेटले पराजित गर्दै टोलीले पुनरागमन गरेको थियो ।