साफ महिला च्याम्पियनसिपको उपाधि भारतलाई

भारत (गोवा), २३ जेठः दक्षिण एसियाली राष्ट्रहरू सहभागी साफ महिला च्याम्पियनसिपको उपाधि भारतले जितेको छ ।

गोवास्थित पण्डित जवाहरलाल नेहरु रङ्गशालामा आज भएको फाइनल खेलमा भारतले दुईपल्टको डिफेन्डिङ च्याम्पियन बङ्गलादेशलाई ३–१ गोलअन्तरले हराउँदै साफको छैटौँ पटक उपाधि जितेको हो । पछिल्लो समय भारतले सात वर्षअघि उपाधि जितेको थियो । पछिल्लो पटक भारतले सन् २०१९ मा नेपालमा नै आयोजना भएको साफ च्याम्पियनसिपको उपाधि जितेको थियो । त्यसअघि साफको पहिलो संस्करणदेखि लगातार पाँचौँ संस्करणसम्म भारतले उपाधि जितेको थियो । त्यसपछि अहिले नवौँ संस्करणमा फेरि उपाधि उचालेको हो ।

भारतका लागि प्यारी सासाले खेलकोे ४२औँ मिनेटमा गोल गर्दै अग्रता लिइन् । त्यसपछि खेलको पहिलो हाफको अत्तिरिक्त समयमा बङ्गलादेशकी खेलाडी ऋतुपोर्ना चक्माले गोल गदै बराबरी गरिन् । खेलको दोस्रो हाफको सुरुआतमै सन्फिदा नोङरुमले भारतका लागि दोस्रो गोल गरिन् । खेलको ८४औँ मिनेटमा लिन्दा कोम सेर्टोलेले गोल गर्दै आफ्नो टोलीको जित सुनिश्चित गरिन् । यसअघि समूह चरणको खेलमा पनि भारतले बङ्गलादेशलाई ३–० गोलअन्तरले हराएको थियो ।

भारतले भुटानलाई तथा बङ्गलादेशले नेपाललाई पराजित गर्दै फाइनल यात्रा तय गरेका थिए । बङ्गलादेशले साफमा दुईपटक उपाधि उचालेको छ ।