भियतनामी भिक्षुद्वारा बौद्धनाथ, स्वयम्भूनाथ र चारुमती बिहारको शान्ति पदयात्रा

काठमाडौँ, २ असारः शान्ति पदयात्राका क्रममा नेपाल आउनुभएका भियतनामी भिक्षुको समूहले विश्व सम्पदा सूचीमा सूचिकृत बौद्धनाथ, स्वयम्भूनाथ, चारुमती चैत्य एवं बिहारलगायत सम्पदाको अवलोकन गरेको छ ।

पदयात्रामार्फत् विश्वभरि शान्तिको सन्देश प्रसारण गरेपछि भिक्षु रत्नगुणाको समूह सोमबार बुद्धको जन्मभूमि नेपाल आउनुभएको हो । उहाँ भियतनामी थेराबाद बौद्ध सङ्घका संस्थापक एवं प्रथम सङ्घराज भन्ते वमसरखिता महाथेरोझका एकमात्र जीवित शिष्य हुनुका साथै भिक्षु पन्नाकाराका गुरु पनि हुनुहुन्छ । उहाँकै निर्देशनमा २४ जना भिक्षुले १०८ दिनसम्म अमेरिकाका विभिन्न राज्यमा गरी तीन हजार ७०० किलोमिटर शान्ति पदयात्रा गरेका थिए । यसको नेतृत्व भिक्षु पन्नाकारले गर्नुभएको थियो ।

शान्ति अभियानअन्तर्गत नेपाल आएको यो टोलीमा भिक्षु पन्नाकारा, उहाँका गुरुलगायत हुनुहुन्छ । यसका साथै पदयात्रा अमेरिकाको तीन हजार ७०० किमी पदयात्रा पुरा गरेको चर्चित अलोका नामको कुकुर पनि सँगै छ । उहाँहरू थाइल्याण्डबाट दिल्ली हुँदै नेपाल आउनुभएको हो ।

यो यात्राको उद्देश्य विश्व शान्ति, करुणा, अहिंसा र सजगताको सन्देशलाई व्यावहारिकरूपमा सबैका माझ पु¥याउनु हो । प्राविधिक पृष्ठभूमिबाट आउनुभएका यी भिक्षुले बौद्ध शिक्षालाई आधुनिक तथा सरल तरिकाले प्रस्तुत गर्ने गर्नुभएको जनाइएको छ । पदयात्राका क्रममा विभिन्न समुदायसँग संवाद गर्ने, ध्यान गराउने र ‘शान्ति बाहिर होइन, आफूभित्रबाट सुरु हुन्छ’ भन्ने सन्देश बाँड्ने कार्यक्रम रहेको छ । भारत, श्रीलङ्का र नेपालजस्ता देशमा पनि भ्रमणमार्फत् उनीहरूले बौद्ध धर्मलाई मानवता र सहअस्तित्वको लागि प्रेरणा बनाउने गर्नुभएको छ ।

शान्ति भीडबाट प्राप्त हुँदैन भनेर बुद्धले आफैँभित्र खोजेजस्तै भिक्षुले शान्ति प्राप्तिको लागि कुनै महायज्ञ र अनुष्ठान नगरी अशान्त हुनाका कारण खोजेको जनाइएको छ । सिद्धार्थ गौतम बुद्ध भइसकेपछि पनि कुनै विजययात्रा गरेनन् । बरु ज्ञान बाँड्नतिर लागे जस्तै यी भिक्षु पनि बुद्धको त्यही बाटो हिड्दै यहाँ आइपुग्नुभएको हो ।

दुःखको निवारण र शान्तिको लागि विना भेदभावको बाटो बुद्ध हिँडेको बाटो हो र यो बाटोको प्रारम्भ बिन्दु नेपाल हो भन्ने मान्यताका आधारमा उहाँहरू नेपाल आउनुभएको हो । यसैगरी आजै उहाँहरूलाई संस्कृति, पर्यटन तथा नागरिक उड्डयनमन्त्री खडकराज पौडेलले शान्ति पदयात्रामा सहभागी भई आएका अलोका र भिक्षुको टोलीलाई काठमाडौँमा स्वागत गर्नुभएको मन्त्रालयको सामाजिक सञ्जालमा उल्लेख छ ।

घाम, पानी, हिउँ र अनेकौँ कठिनाइबीच पनि भिक्षुको साथ नछोड्ने अलोकाले करुणा, मैत्री, निष्ठा र सहअस्तित्वको अनुपम उदाहरण प्रस्तुत गरेको छ । अमेरिकामा भिक्षुसँगै १०८ दिनसम्म तीन हजार ७०० किलोमिटरभन्दा बढी दूरी पार गर्दै शान्ति पदयात्रा अभियानमार्फत लाखौँ मानिसको मन जितेको ‘अलोका’ नामक कुकुर र भियतनामी भिक्षुको टोली सोमबार नेपाल आइपुगेको हो ।

बुद्धको शिक्षाले भन्छ, ‘शान्ति बाहिरबाट आउँदैन, शान्ति हाम्रो मनबाट सुरु हुन्छ’ । यस पदयात्राले त्यही सन्देशलाई अझ गहिरोसँग स्मरण गरायो, मानिस मात्र होइन, सबै प्राणीमा मैत्री र करुणा विस्तार गर्न सके मात्र साँचो शान्ति सम्भव छ । रासस