दुई दशकदेखि लोकसंगीतमा सानु सुर्खाली, तीजमा ल्याइन् ‘यो साल माइती आइन’ (भिडियो)

काठमाडौं । लायन्स क्लब अफ काठमाडौं बेथेलकी संस्थापक अध्यक्ष तथा गायिका सानु सुर्खाली श्रेष्ठको नयाँ तीज गीत ‘यो साल माइती आइन’ सार्वजनिक भएको छ। दुई दशकभन्दा लामो समयदेखि लोकसंगीतमा सक्रिय सुर्खालीको यो गीत युट्युबमार्फत सार्वजनिक गरिएको हो।

तीजको सांस्कृतिक भावनासँगै महिलाले भोग्नुपरेका पारिवारिक तथा सामाजिक अवस्थालाई विषय बनाइएको गीतमा घरायसी समस्याका कारण माइती जान नपाएकी चेलीको पीडा र माइतीप्रतिको भावनालाई मार्मिक रूपमा प्रस्तुत गरिएको छ।

गीतमा चर्चित सर्जक शिव हमालको शब्द तथा जय देवकोटाको संगीत र एरेन्ज रहेको छ। सुर्खालीले आफ्नै स्वरमा प्रस्तुत गरेको गीतले तीजको उत्सवसँगै चेली–माइतीबीचको भावनात्मक सम्बन्धलाई समेत उजागर गरेको छ।

गीतको भिडियो मदन खड्काको निर्देशनमा तयार पारिएको हो। भिडियोमा तारा केसी, सानु सुर्खाली, लक्ष्मण चौलागाईं, रती खत्री, अन्जान श्रेष्ठ, उज्ज्वल थापा र निरुता बयलकोटीले अभिनय गरेका छन्।

लोकसंगीतमा लामो समयदेखि सक्रिय सुर्खालीका यसअघि ‘सेल्फी हान्दै’, ‘बटौली’ र ‘हुइकाउँदै गाडी’ लगायतका गीत चर्चामा आएका छन्। नयाँ गीतमार्फत उनले तीजको मौलिक संस्कृति र चेलीहरूको भावनालाई संगीतसँग जोड्ने प्रयास गरेकी छन्।

‘यो साल माइती आइन’ले मनोरञ्जनसँगै माइती जान नपाएका चेलीहरूको मनोभाव र पीडालाई समेत आवाज दिने भएकाले यस वर्षको तीजमा श्रोतामाझ फरक भाव बोकेको गीतका रूपमा प्रस्तुत भएको छ।

भिडियो हेर्नुहोस्ः