भाद्र २३, २०८३ मंगलबार
September 8, 2026
युग खबर
२०८३ भाद्र २३, मंगलबार
नवलपरासी ।सुस्ता गाउँपालिका–३ पथरकलास्थित सीमा क्षेत्रबाट भारततर्फ अवैध रूपमा लैजानका लागि लुकाएर राखिएका ८०१ थान शालिग्राम प्रहरीले बरामद गरेको छ।
जिल्ला प्रहरी कार्यालय नवलपरासीका अनुसार भन्सार छली गरी नेपालबाट भारततर्फ लैजानका लागि बेवारिसे अवस्थामा लुकाएर राखिएका शालिग्राम बरामद गरिएको हो।
प्रहरी चौकी कुडियाबाट खटिएको गस्ती टोलीले सीमा क्षेत्रमा बेवारिसे अवस्थामा राखिएका शालिग्राम बरामद गरेको प्रहरीले जनाएको छ। बरामद शालिग्रामको अनुमानित मूल्य तीन लाख २० हजार रुपैयाँ बराबर रहेको जिल्ला प्रहरी कार्यालयले जनाएको छ।
बरामद शालिग्राम आवश्यक कारबाहीका लागि महेशपुर भन्सार कार्यालयमा बुझाउने प्रक्रिया अघि बढाइएको जिल्ला प्रहरी कार्यालय नवलपरासीका सूचना अधिकारी प्रहरी नायब उपरीक्षक मदन थापाले जानकारी दिनुभयो।
युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया