प्रधानसेनापति सिग्देल सातदिने औपचारिक भ्रमणका लागि बेलायत जाँदै

काठमाडौं । प्रधानसेनापति अशोकराज सिग्देल सातदिने औपचारिक भ्रमणका लागि सोमबार बेलायत प्रस्थान गर्ने भएका छन्।

नेपाली सेनाका अनुसार बेलायती समकक्षीको निमन्त्रणामा प्रधानसेनापति सिग्देल बेलायत भ्रमणमा जान लागेका हुन्। प्रधानसेनापतिको जिम्मेवारी सम्हालेपछि उनको यो पहिलो बेलायत भ्रमण हुनेछ।

भ्रमणका क्रममा प्रधानसेनापति सिग्देलले बेलायती सेनाका प्रधानसेनापति जनरल सर रोलान्ड ‘रोली’ वाकरसहित बेलायती सेनाका उच्च अधिकारीहरूसँग भेटवार्ता गर्ने कार्यक्रम रहेको नेपाली सेनाले जनाएको छ।

भेटवार्ताका क्रममा नेपाल र बेलायतबीच लामो समयदेखि कायम रहेको सैनिक सम्बन्ध तथा द्विपक्षीय रक्षा सहकार्यका विषयमा छलफल हुने अपेक्षा गरिएको छ। विशेषगरी नेपाली सेनाका गोर्खा सैनिकले बेलायती सेनामा गर्दै आएको सेवासहित दुई देशका सेनाबीचको सहकार्यका विविध पक्षमा विचार आदानप्रदान हुने बताइएको छ।

प्रधानसेनापति सिग्देलको भ्रमणलाई नेपाल–बेलायत सैनिक सम्बन्धलाई थप सुदृढ बनाउने अवसरका रूपमा समेत हेरिएको छ। बेलायती सेनासँग नेपाली सेनाको ऐतिहासिक सम्बन्ध रहँदै आएको छ।

प्रधानसेनापति सिग्देलले यसअघि भदौ २८ देखि असोज ३ गतेसम्म चीनको औपचारिक भ्रमण गरेका थिए। चीन भ्रमणपछि उनी पुनः अर्को महत्वपूर्ण सैन्य साझेदार राष्ट्रको भ्रमणमा जान लागेका हुन्।

सातदिने बेलायत भ्रमण पूरा गरी प्रधानसेनापति सिग्देल असोज २५ गते स्वदेश फर्कने कार्यक्रम रहेको नेपाली सेनाले जनाएको छ।