इरानको निशानामा अमेरिकी अर्थमन्त्री, सुरक्षाका लागि सैनिक बेसमा आश्रय

अमेरिका । इरानबाट ज्यान मार्ने धम्की प्राप्त भएपछि अमेरिकी अर्थमन्त्री स्कट बेसेन्टले आफ्नो सुरक्षालाई प्राथमिकता दिँदै वासिङ्टन क्षेत्रस्थित निजी निवास छाडेर अमेरिकी सैन्य बेसमा बसाइँ सर्नुभएको छ । द न्युयोर्क टाइम्सले मङ्गलवार घटनाबारे जानकार तीन स्रोतलाई उद्धृत गर्दै यससम्बन्धी समाचार सार्वजनिक गरेको हो ।

अमेरिकी राष्ट्रपति डोनाल्ड ट्रम्पको प्रशासनमा महत्त्वपूर्ण जिम्मेवारी सम्हालिरहनुभएका बेसेन्टले पछिल्लो समय इरानको अर्थतन्त्रलाई कमजोर बनाउने अमेरिकी आर्थिक अभियानको नेतृत्व गर्दै आउनुभएको छ । इरानमाथि विभिन्न आर्थिक तथा वित्तीय प्रतिबन्ध लगाएर उसको आर्थिक गतिविधिलाई नियन्त्रण गर्ने अमेरिकी रणनीतिमा उहाँको प्रमुख भूमिका रहेको छ ।

अमेरिकाले इरानमाथि आर्थिक दबाब बढाउने उद्देश्यले प्रतिबन्धको विस्तृत सञ्जाल विस्तार गरेको छ । यस अभियानमार्फत इरानको वित्तीय स्रोत सीमित पार्ने र उसको आर्थिक क्षमतालाई कमजोर बनाउने प्रयास भइरहेको छ । यही भूमिकाका कारण बेसेन्ट इरानको सम्भावित निशानामा पर्नुभएको हुन सक्ने अमेरिकी अधिकारीहरूको आकलन रहेको समाचारमा उल्लेख छ ।

अमेरिकी राष्ट्रिय गुप्तचर निकायका प्रमुख जे क्लेटनले गत महिना इरानले मध्यपूर्वसहित अन्य क्षेत्रमा रहेका अमेरिकी नागरिक तथा अधिकारीहरूलाई लक्षित गर्ने प्रयास उल्लेख्य रूपमा बढाएको चेतावनी दिनुभएको थियो ।

द न्युयोर्क टाइम्सका अनुसार इरानबाट वर्तमान तथा पूर्वअमेरिकी अधिकारीहरूलाई लक्षित गर्ने योजनाहरू थप उन्नत चरणमा पुगेका छन् । यसमा अर्थमन्त्री बेसेन्टलाई लक्षित गरिएको सम्भावित गतिविधि पनि समावेश रहेको बताइएको छ । यद्यपि उहाँमाथि रहेको सुरक्षा जोखिमको वास्तविक गम्भीरताबारे विस्तृत विवरण सार्वजनिक गरिएको छैन ।

यस घटनापछि अमेरिकी अर्थ मन्त्रालयका प्रवक्ताले बेसेन्ट इरानी सरकारको धम्कीबाट विचलित नहुने र इरानको अर्थतन्त्रमाथि दबाब कायम राख्ने अभियानमा प्रतिबद्ध रहनुभएको बताउनुभएको छ । उहाँले निर्धारित जिम्मेवारीबाट पछि नहट्ने स्पष्ट पार्नुभएको छ ।

यसैबीच, इरानसँग सम्बन्धित सुरक्षा चुनौतीलाई ध्यानमा राख्दै अमेरिकाले मध्यपूर्वमा आफ्ना कूटनीतिक तथा सैन्य संरचनाको सुरक्षा व्यवस्था पनि कडा बनाउँदै आएको छ । गत महिना साउदी अरेबियास्थित अमेरिकी दूतावासका अत्यावश्यकबाहेकका कर्मचारी तथा उनीहरूका परिवारलाई सुरक्षा कारण देश छाड्न निर्देशन दिइएको थियो ।

त्यस्तै, इरानबाट सम्भावित खतराको सूचना प्राप्त भएपछि अमेरिकी सेनाले बेलायतस्थित आफ्ना दुई सैन्य बेसबाट केही विमान अन्यत्र सारेको समाचार पनि सार्वजनिक भएको छ ।

अर्कोतर्फ, मध्यपूर्वमा जारी युद्ध अन्त्य गर्न कूटनीतिक प्रयास भइरहेका छन् । अमेरिकी प्रशासनले इरानमाथि आर्थिक दबाब बढाएर सैन्य तनाव कम गर्ने रणनीतिलाई प्राथमिकता दिइरहेको जनाएको छ ।

यद्यपि, इरानले अमेरिकी अधिकारीहरूलाई लक्षित गरी आक्रमणको योजना बनाएको आरोपबारे स्वतन्त्र रूपमा पुष्टि भएका सबै विवरण सार्वजनिक भएका छैनन् । यस घटनाले अमेरिका र इरानबीचको तनावका बीच उच्चपदस्थ अमेरिकी अधिकारीहरूको सुरक्षालाई लिएर थप चिन्ता उत्पन्न गरेको छ । रासस