काठमाडौं गोर्खाजलाई ७ रनले हराउँदै सुदूरपश्चिम रोयल्स प्लेअफमा

काठमाडौं। सुदूरपश्चिम रोयल्स नेपाल प्रिमियर लिग (एनपीएल) को प्लेअफमा प्रवेश गरेको छ।

आफ्नो अन्तिम लिग खेलमा काठमाडौं गोर्खाजलाई ७ रनले पराजित गर्दै सुदूरपश्चिमले प्लेअफमा स्थान पक्का गरेको हो।

लिग चरणको सात खेलमध्ये पाँचमा जित र दुईमा हार बेहोरेको सुदूरपश्चिम १० अंकसहित अंक तालिकाको शीर्ष स्थानमा रहन सफल भएको छ।

सुदूरपश्चिमले प्रस्तुत गरेको १२६ रनको लक्ष्य पछ्याएको काठमाडौंले निर्धारित २० ओभरमा ७ विकेटको क्षतिमा ११८ रन मात्र बनाउन सक्यो। पराजयसँगै काठमाडौंको प्लेअफ यात्राका लागि थप प्रतीक्षा गर्नुपर्ने भएको छ।

हालसम्म ६ खेल खेलेको काठमाडौं ४ जित र २ हारका साथ ८ अंक जोड्दै तालिकाको तेस्रो स्थानमा छ। काठमाडौंले आफ्नो अन्तिम लिग खेल पोखरा एभेन्जर्सविरुद्ध खेल्न बाँकी छ।