जनकपुरलाई २७ रनले हराउँदै सुदूरपश्चिम अंकतालिकाको दोस्रो स्थानमा

काठमाडौं । जनकपुर बोल्ट्सविरुद्ध २७ रनको जित निकाल्दै सुदूरपश्चिम रोयल्स नेपाल प्रिमियर लिग (एनपीएल) को तेस्रो सिजनमा दोस्रो स्थानमा उक्लिएको छ ।

यो जितसँगै सुदूरपश्चिमले आठ अंक जोड्यो । टोलीले ६ खेल खेल्दा चार जित र दुई हार व्यहोरेको छ ।

तर, समान आठ अंक बनाएको काठमाण्डूले सुदूरपश्चिमलाई रनरेटको आधारमा पछाडि पारेको छ । जितसँगै टोलीको प्लेअफ सम्भाना पनि बलियो बनेको छ ।

मंगलबार कीर्तिपुरस्थित त्रिवि क्रिकेट रंगशालामा सुदूरपश्चिमले प्रस्तुत गरेको १२१ रनको लक्ष्य पछ्याएको जनकपुरले १९.५ ओभरमा सबै विकेट गुमाएर ९३ रन मात्र जोड्न सक्यो ।

मंगलबार कीर्तिपुरस्थित त्रिवि क्रिकेट रंगशालामा सुदूरपश्चिमले प्रस्तुत गरेको १२१ रनको लक्ष्य पछ्याएको जनकपुरले १९.५ ओभरमा सबै विकेट गुमाएर ९३ रन मात्र जोड्न सक्यो ।

जनकपुरलाई सस्तैमा रोक्न स्कट कुगेलेइनले तीन महत्त्वपूर्ण विकेट लिए । उनले चार ओभर बलिङ गर्दा १३ रन खर्चिए ।

उनको इनिङ जनकपुरलाई पावर प्लेमा कमजोर बनाउन निर्णायक बन्यो । कुगेलेइनले २.२ ओभरमा पहिलो विकेटमा जनपुरका अनिल कुमार साहलाई आउट गरे । अनिल उक्त बलमा ‘एज’ लागेर विकेटकिपर विनोद भण्डारीबाट क्याच भएका थिए ।

यसपछि, उनले ४.४ ओभरमा ह्यारी टेक्टरलाई कप्तान दीपेन्द्रसिंह ऐरीबाट क्याच गराए । स्कटविरुद्ध टेक्टरले लामो सटको प्रयास गर्दा दीपेन्द्रले शान्दार रनिङ क्याच गर्दै उनलाई पभेलियनको दिशा देखाएका थिए ।

यी दुई विकेट गुमाएपछि टोलीले पावर प्लेमै खराब सुरुआत गर्‍यो । टोलीले तीन विकेटको क्षतिमा मात्र २८ रन जोड्नसकेको थियो ।

यसपछि उनले तेस्रो विकेटको रूपमा जनकपुरका जिम्मी निशमलाई १८.२ ओभरमा ब्रान्डन म्याकमुलेनबाट क्याच गराए । २० रन बनाएका जिम्मी क्याच भएपछि टोलीको सबै ब्याटिङ विकल्प पतन भएको थियो ।

टोली रनरेटले पनि निकै पछाडि पर्‍यो । १९.५० को रनरेट पछ्याइरहेको जनकपुरमाथि ३८.०० रन रेट बनाउनुपर्ने दबाबपूर्ण स्थिति आयो ।

उनीबाहेक हेमन्त धामी, थरिन्दु रत्नायके, दीपेन्द्र, अनिल खरेल र इशान पाण्डेले समान एक विकेट लिए ।

जनकपुरका लागि ओपनर तृतराज दासले सर्वाधिक २१ रन बनाए । जिम्मीले २०, राहुल यादवले ११ र आदित्य मेहताले १० रन बनाए ।

त्यसअघि टस जितेर ब्याटिङ रोजेको सुदूरपश्चिमले जनकपुरविरुद्ध निर्धारित २० ओभरमा नौ विकेट गुमाएर १२० रनको योगफल खडा गरेको थियो ।

सुदूरपश्चिमका लागि ब्रान्डनले सर्वाधिक ३३ रन बनाए । अविजित रहेका थरिन्दुले २७ रन बनाए । आरिफ शेखले ११ रन बनाउँदा ओपनर सैफ जैब र विनोदले समान १० रन बनाए ।

जनकपुरका निम्ति कप्तान हर्मित सिंहले सर्वाधिक चार विकेट लिए । उनले चार ओभर बलिङ गर्दा १७ रन खर्चिए । ह्यारी, राहुल, अदित्य मेहता र अभिषेक तिवारीले समान एक विकेट लिए ।

हारसँगै जनकपुरको प्लेअफ सम्भावना कठिन बनेको छ । टोली ६ खेलको समाप्तीमा चार अंकमा सीमित भएको छ । यो नतिजासँगै टोलीमाथि आगामी शुक्रबार हुने चिवनविरुद्धको खेलमा जित निकाल्नैपर्ने दबाब बढेको छ ।