पर्यटन सर्किटमा जोडेर प्रदेशका धार्मिक तथा पर्यटकीय क्षेत्रको विकास र प्रवर्द्धन गरिनेछ : मुख्यमन्त्री भट्ट

सुदूरपश्चिम, २८ कात्तिकः सुदूरपश्चिम प्रदेशका मुख्यमन्त्री खगराज भट्टले प्रदेशका प्रमुख धार्मिक तथा पर्यटकीयस्थललाई एकीकृत पर्यटन सर्किटमा जोडेर विकास तथा प्रवर्द्धन गरिने बताउनुभएको छ ।

बडीकेदार क्षेत्र पर्यटन विकास समिति, डोटीले बडीकेदार धार्मिक पर्यटन जात (मेला)बारे जानकारी दिन आज धनगढीमा आयोजना गरेको पत्रकार सम्मेलनमा उहाँले डोटीको प्रसिद्ध धार्मिकस्थल बडीकेदारलाई पनि सोही सर्किटमा जोडेर विकास गर्ने प्रदेश सरकारको योजना रहेको बताउनुभयो ।

मुख्यमन्त्री भट्टले बडीकेदारको धार्मिक, ऐतिहासिक र प्राकृतिक महत्वलाई उजागर गर्दै आवश्यक पूर्वाधार विकास, प्रचारप्रसार र प्रवर्द्धनमा प्रदेश सरकारले प्राथमिकता दिने उल्लेख गर्नुभयो । धार्मिक तथा प्राकृतिक पर्यटनको पर्याप्त सम्भावना बोकेको बडीकेदारमा आन्तरिक तथा बाह्य पर्यटक आकर्षित गर्नसके स्थानीयस्तरमा आयआर्जन र रोजगारीका अवसरसमेत सिर्जना हुने उहाँको भनाइ थियो ।

“सुदूरपश्चिममा धार्मिक पर्यटनलाई स्थानीय आयआर्जन, रोजगारी र आर्थिक समृद्धिसँग जोडेर लाभ लिनुपर्ने आवश्यकता छ । त्यसका लागि स्थानीय जनता, जनप्रतिनिधि, पर्यटन व्यवसायी तथा सरोकारवाला सबैको सहकार्य आवश्यक छ”, मुख्यमन्त्री भट्टले भन्नुभयो ।

आगामी मङ्सिर ५, ६ र ७ गते बडीकेदार मेला हुँदैछ । मेलाका अवसरमा नारीडाँडा, फुडसिल, बोगटानका क्षेत्र, घाँटुल, मान्नाकापडी, अलाडी तथा कैलालीको चुरे र मोहन्याल क्षेत्रका विभिन्न देवताका देउरो (भाँकी)सहित केदार गाथा गाउने धार्मिक परम्परा रहेको विकास समितिका अध्यक्ष उपेन्द्र बमले जानकारी दिनुभयो । यहाँ कार्तिक त्रियोदशीका दिन राति मेला लाग्ने र चतुर्दशीका दिन बिहान बडीकेदार शीलाको विशेष पूजा हुने गरेको उहाँले बताउनुभयो ।

बडीकेदार धाम सुदूरपश्चिमका प्रमुख शक्तिपीठमध्ये पर्दछ । यहाँ कुनै मन्दिर र त्यसभित्र मूर्ति नभई प्राकृति चट्टान रहेकाले विशेष महत्वका साथ हेर्ने गरिएको पर्यटन विकास समितिका कार्यकारी अधिकृत गणेशराज जोशीले बताउनुभयो ।

उक्त धाम पुग्न धनगढीबाट भीमदत्त राजमार्ग हुँदै सहजपुर–बिपीनगर–बडुखोली–अतरकाँडा भएर करिब ११६ किलोमिटर सडक यात्रा गर्नुपर्छ । अतरकाँडाबाट करिब दुई घण्टाको उकालो पैदल यात्रा गरेपछि धाम पुग्न सकिन्छ । पछिल्लो समय त्यहाँ पक्की सिँढी निर्माण गरिएकाले तीर्थयात्रीलाई आवतजावतमा सहज भएको आयोजकले जनाएको छ । रासस