अमेरिकामा १० दिनमै थपिए ११ लाख २९ हजार कोरोना संक्रमित

काठमाण्डौंः अमेरिकामा बुधबार एकै दिन १ लाख ३६ हजार कोरोना संक्रमित थपिएका छन् । यो अहिलेसम्म एकै दिन धेरै संक्रमित भेटिएको घटना हो। अमेरिकामा संक्रमितको आँकडा १ करोड ७० लाखभन्दा धेरै पुगेको छ। त्यहाँ हालसम्म २ लाख ४७ हजार मानिसले ज्यान गुमाइसकेका छन् ।

यता विश्‍वभर कोरोनाका बिरामीको संख्या बढेर ५ करोड २४ लाख पुगेको छ। तर तीन करोड ६६ लाख मानिस निको भएका छन्। अहिलेसम्म १२ लाख ८८ हजार मानिसले ज्यान गुमाएका छन् ।

विश्‍वकै सबैभन्दा चपेटामा परेको अमेरिकामा संक्रमण तीव्र गतिमा बढिरहेको छ । बुधवार त्यहाँ कीर्तिमानी १ लाख ३६ हजार नयाँ संक्रमित थपिएका हुन्। बितेको १० दिनमा अमेरिकामा ११ लाख २९ हजार ४६३ जना नयाँ संक्रमित थपिएका छन् । यता चीनमा केही दिनको राहतपछि फेरि १५ जना नयाँ संक्रमित भेटिएका छन् ।

न्यूयोर्कमा प्रतिबन्ध

अमेरिकामा एक दिनमै कीर्तिमानी संख्यामा बिरामी थपिएपछि तनाव बढ्दै गएको छ । १० दिनयता त्यहाँ लगातार दैनिक एक लाखभन्दा धेरै संक्रमित थपिएका छन्। यसैबीच न्यूयोर्कका गभर्नर एन्ड्रू कुमोले राज्यमा प्रतिबन्धको घोषणा गरेका छन्। कुमोले प्रतिबन्ध नलगाई कोरोना नियन्त्रण सम्भव नरहेको बताएका छन् ।

अब न्यूयोर्कमा पार्टीसहितका भिड हुने कार्यक्रम गर्न पाइने छैन । व्यापारका लागि पनि शर्त तोकिएको छ। न्यूयोर्कमै फेरि बिहीबार १६ सय २८ नयाँ संक्रमित थपिएका छन् भने २१ जनाको ज्यान गएको छ।