युरोपा लिग-टोटेनहम हटस्पर नकआउट चरणमा प्रवेश

काठमाण्डौंः इंग्लिस क्लब टोटेनहम हटस्पर युरोपा लिगको नकआउट चरणमा प्रवेश गरेको छ । गएराति अष्ट्रियन क्लब लास्कसँग तीन तीन गोलको बराबरीमा रोकिएपनि टोटेनहमले अन्तिम ३२ मा स्थान पक्का गरेको हो ।

समूह ‘जे’ मा टोटेनहमले ५ खेलबाट १० अंक जोड्दै दोस्रो स्थानमा रहेर नकआउट चरणमा स्थान बनाउन सफल भएको हो । शीर्षस्थानमा रहेको रोयल एन्टवेर्पको १२ अंक छ ।

लास्कको ७ तथा लुडोगोरेट्स राजग्राडले अंक जोड्न सकेको छैन । खेलको ४२औं मिनेटमा मिचर्लको गोलबाट घरेलु टोली लास्कले एक शुन्यको अग्रता लिएको थियो । खेलको ४५औं मिनेटमा ग्यारेथ बेलले पेनाल्टीमार्फत गोल गर्दै खेललाई १–१ गोलको बराबरीमा ल्याए ।

लुकास मोउराको क्रसलाई पेनाल्टी बक्समा एन्डराडेले ह्यान्ड गर्न पुगेपछि रेफ्रीले टोटेनहमलाई पेनाल्टी दिएका थिए । जसलाई बेलले गोलमा परिणत गर्न सफल भए । त्यस्तै खेलको ५६औं मिनेटमा टांगी एनडोम्वेलेको पासमा ह्युङ मिन सनले गोल गर्दै टोटेनहमलाई २–१ को अग्रता दिलाए ।

खेलको ८४औं मिनेटमा जोहाननेस इगेस्टिनले गोल गर्दै खेललाई २–२ गोलको बराबरीमा ल्याए । खेलको ८७औं मिनेटमा डेल अलीले पेनाल्टीमार्फत गोल गरेपछि टोटेनहमले खेलमा पुनः ३–२ को अग्रता लिएको थियो ।

तर खेलको ९०औं मिनेटमा मामोउडोउ कारामोकोले गोल गर्दै घरेलु टोलीलाई हारबाट जोगाए ।

यही समूहको अर्को खेलमा बेल्जियन क्लब रोयल एन्टवेर्पले बुल्गेरियन क्लब लुडोगोरेट्स राजग्राडमाथि ३–१ गोल अन्तरको जित निकाल्दै समूहमा शीर्षस्थानमा यथावत रहन सफल भएको छ ।