बैसाख २६, २०८३ शनिबार
May 9, 2026
युग खबर
२०७७ फागुण २४, सोमबार
काठमाडौंः नेपालको आफ्नै भू–उपग्रह (स्याटलाइट) राख्न आवश्यक अध्ययनका लागि विभिन्न मुलुकका पाँच कम्पनी छनौट (सर्टलिस्ट) मा परेका छन् ।
स्याटलाइटको अध्ययन गर्न नौ कम्पनीले आशय पत्र बुझाएकामा नेपाल दूरसञ्चार प्राधिकरणले पाँच कम्पनी छनौट गरेको हो ।
प्राधिकरणले गत मङ्सिरमा पुरानो प्रस्ताव रद्द गरेर भू–उपग्रह स्थापनाको नियमन तथा सुरक्षा, व्यापार र सञ्चालन ढाँचा, नीति तय गर्न नयाँ प्रस्ताव आह्वान गरेको हो ।
प्राधिकरणले गरेको माग अनुसार आशय पत्र बुझाएका कम्पनी मध्येबाट पाँच कम्पनीलाई छनोट गरिएको प्राधिकरणका प्रवक्ता मीनप्रसाद अर्यालले जानकारी दिनुभयो । छनोटमा परेका कम्पनीमा फ्रान्स, दुबई, अमेरिका, बेलायत र भारतका रहेका छन् ।
छनौटमा परेका कम्पनीमध्ये चालिस प्रतिशत कम्पनीको योग्यता, ५० प्रतिशत अनुभव र १० प्रतिशत क्षमताका आधारमा कम्पनी छनोट गरिने प्रवक्ता अर्यालले जानकारी दिनुभयो । पहिलो चरणमा छनोट हुने कम्पनीले आवश्यक सम्पूर्ण तयारी गरेपछि भू–उपग्रह स्थापनाका लागि पुनः अर्को कम्पनी छनोट गरिनेछ ।
नेपाल दूरसञ्चार प्राधिकरणले २०७३ साल असोज २० गते आह्वान गरेको आशय पत्रमा १२ देशका २२ कम्पनीले स्याटलाइट राख्न रुचि देखाएका थिए । दूरसञ्चार सेवा प्रदायक रेडियो तथा टेलिभिजन विदेशी स्याटलाइटबाट सञ्चालित हुँदै आएकामा आफ्नै स्याटलाइट जडान गरेर रेडियो तथा टेलिभिजन सञ्चालन गर्ने सरकारको लक्ष्य छ ।
युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया