शुरु शैक्षिक सत्रका लागि भर्ना अभियानमा लाग्न विद्यालयलाई केन्द्रको निर्देशन

काठमाडौंः शिक्षा तथा मानव स्रोत विकास केन्द्रले यही असार १ गते देखि शुरु भएको शैक्षिक सत्रको भर्नाका लागि सम्पुर्ण विद्यार्थी तथा अभिभावहरुलाई सूचना प्रबह गरी सम्पर्क गर्न सबै सामुदायिक तथा संस्थागत विद्यालयहरुलाई निर्देशन दिएको छ ।

विद्यालयहरुले आ आफ्नो सेवा क्षेत्र भित्रका अभिभावकहरुलाई टेलिफोन,इन्टरनेट, एफ.एम रेडियो ,टेलिभिजन तथा सामाजिक सञ्जाल समेतका माध्यमबाट सूचना प्रवह गरी विद्यालय उमेर समुहका सम्पूर्ण बालबालिकाहरुलाई विद्यालय भर्नाको व्यावस्था मिलाउन भनिएको हो ।

विद्यार्थी भर्ना कार्यक्रम सञ्चालन गर्दा सम्बन्धित स्थानीय तह तथा प्रशासनसँग आवश्यक समन्वय तथा स्वास्थ्यका मापदण्ड पालना गरेर सञ्चालन गर्न भनिएको छ । साथै भर्ना अभियानको पहिलो चरण असार १५ गते सम्म सञ्चालन गर्ने र दोस्रो चरणका लागि विभिन्न सञ्चार माध्यमको अवलम्बन गरी असार मसान्तसम्म विद्यालय उमेर समुहका सबै बालबालिकालाई भर्नाको व्यावस्था गर्न केन्द्रले सूचना जारी गरेको छ ।

विद्यार्थीको भर्नाको अभिलेखिकरणका लागि सुचना प्रविधि लगायतका वैकल्पिक उपाय अपनाई भर्ना गर्ने त्यसका लागि अनलाइन भर्ना,फोन इन भर्ना समेतका विधि अवलम्बन गर्नपर्ने छ । साथै भर्नाको समयमा अभिभावकको सम्पर्क नम्बर,इमेल,ठेगना लगायतका विवरण पनि संकलन गर्नु पर्ने र वैकल्पिक सिकाइका लागि कुन माध्यममा विद्यार्थीको पहुँच छ सो पहिचान गरी अभिलेखिकरण राख्नु पर्ने छ ।

भर्ना भएका विद्यार्थीहरुका लागि निःशुल्क पाठ्यपुस्तक उपलब्ध गराई वैकल्पिक माध्यमबाट पठनपाठन शुरु गर्ने र भर्ना भएका विद्यार्थीको पूर्ण विवरण सहितको अभिलेख राखि भर्नाकार्यक्रम सम्पन्न पछि IEMIS मा अद्यावधिक गर्नु पर्ने छ ।

त्यसै गरी सबै स्थानीय तह र ७७ वटै शिक्षा विकास तथा समन्वय इकाईहरुले आ आफ्नो सेवा क्षेत्र भित्र भर्ना कार्यक्रमका लागि आवश्यक समन्वय र सहजिकरण गरिदिन समेत निर्देशन दिएको छ । खबर एजुकेशन