बागमती प्रदेश: विनियोजन विधेयकमाथि छलफल जारी

काठमाण्डौंः बागमती प्रदेशको प्रदेश सभा बैठक आज पनि जारी रहेको छ ।

प्रदेश सभाको दशौँ अधिवेशन अन्तर्गतको तेस्रो बैठकमा हिजो प्रदेशका आर्थिक मामिला तथा योजना मन्त्री शालिकराम जम्मकट्टेलले पेश गर्नुभएको आगामी आर्थिक वर्षको विनियोजन विधेयक २०७९ को सिद्धान्त र प्राथमिकतामाथि छलफल चलिरहेको छ ।

बैठकमा प्रदेश सभाका सदस्यहरु बजेटको सिद्धान्त र प्राथमिकता छलफल भन्दा पनि एक अर्कालाई आरोप प्रत्यारोपमा व्यस्त छन् । असारमा ल्याउने बजेट सरकारले कस्तो ल्याउनुपर्छ कस्ता विषयलाई प्राथमिकता दिनुपर्छ भन्ने कुरामा भन्दा पनि अन्य विषयमा छलफल केन्द्रित छ ।

बैठकमा प्रमुख प्रतिपक्षी दल नेकपा एमालेका नेता एवम् बागमती प्रदेशका पूर्व अर्थमन्त्री कैलाशप्रसाद ढुङ्गेलले हालै सम्पन्न स्थानीय निर्वाचनलाई प्रभावित पार्न बागमती प्रदेश सरकारले २३ सय टुक्रे योजना ऐन विपरीत बाडेको आरोप लगाउनुभयो ।

बैठकमा नेकपा माओवादी केन्द्र बागमती प्रदेशका उपाध्यक्ष एवम् प्रदेशसभा सदस्य प्रेमबहादुर पुलामी ‘छिन्तु’ ले स्थानीय निर्वाचनमा गठबन्धन गर्नुको उद्देश्य सत्ता हत्याउन नभई प्राप्त उपलब्धि जोगाउनु रहेको बताउनुभयो ।

यस्तै बागमती प्रदेशसभा सदस्य एवम् विवेकशील साझा पार्टीका नेता विराजभक्त श्रेष्ठले ‘कमरेड’ शब्द बदनाम हुँदै गएको बताउनुभएको छ ।

प्रदेशसभा सदस्य एवम् विवेकशील साझा पार्टीकी नेतृ शोभा शाक्यले प्रदेश सरकारलाई टर्च लाइट बालेर खोज्नुपर्ने अवस्था आएको भन्दै टिप्पणी गर्नुभयो । उहाँले जनताले सरकारको महशुस समेत गर्न नसकेको बताउनुभयो ।