चीनको वुहानबाट काठमाडौँ आइपुग्यो १७५ जना नेपाली

काठमाडौँ । चीनको हुबेइ प्रान्तका ६ सहरमा रहेका १ सय ७५ जना नेपाली लिएर नेपाल वायुसेवा निगमको जहाज वुहानबाट काठमाडौँ आएको छ ।

शनिबार राति त्यहाँको स्थानीय समयअनुसार १२ बजेर ५२ मिनेटमा काठमाडौँतर्फ प्रस्थान सो विमान नेपाली समय अनुसार आइतबार बिहान साढे तीन बजे काठमाडौँ अवतरण गरेको हो ।

बेइजिङ दूतावासका डिसिएम सुशील लम्सालका अनुसार जहाजमा १ सय ७० विद्यार्थी, १ कामदार, २ अन्य यात्री र २ बालबालिका थिए । चीनमा रहेको नेपाली दूतावासले ६ विभिन्न सहरमा आउने नेपालीका लागि ६ वटा गाडीको व्यवस्था गरेको थियो।

वुहानबाट ५५, एन्सीबाट २६, सियानबाट २९, यिचाङबाट ८, जिङमेनबाट ९ र जिङ्जाओबाट ४८ यात्रुसहित १७५ जना लिएर विमान आएको हो ।

विमानमा चढ्नुअघि यात्रुहरुको आवश्यक स्वास्थ्यजाँचसाथै ज्वरो नापिएको थियो।

चार जना यात्रुले अन्तिम समयमा वुहानमै बस्ने निर्णय गरेका थिए भने ६ जनाले स्वास्थ्यका कारण विमानमा चढ्न पाएनन् ।

उक्त जहाजमा नेपालले चीनलाई सहयोग दिएका १ लाख मास्क पनि वुहान र्पुयाइएको थियो। यी १७५ जनालाई दुई सातासम्म भक्तपुरको खरिपाटीस्थित क्वारेन्टाइनमा राखिनेछ।