निर्मला पन्तको हत्यारालाई कारबाही नगरे कांग्र्रेस चुप लाग्दैन– देउवा

काठमाडौं । नेपाली कांग्रेसका सभापति शेरबहादुर देउवाले निर्मला पन्तको हत्यारालाई सरकारले कारबाही नगरे नेपाली कांग्रेस चुप लागेर नबस्ने बताउनु भएको छ ।

देउवालेकञ्चनपुरकी बालिका निर्मला पन्तको बलात्कारपछि हत्यामा संलग्नलाई कारबाही गर्नुको सट्टा सरकारले दोषीलाई बचाउने प्रयास गरेको आरोप लगाउदै यस्तो चेतावनी दिनुभएको हो ।

घटना घटेको तीन महिना हुँदा पनि सरकारले दोषीलाई कारबाही नगरेको भन्दै सभापाति देउवाले सरकारको चर्को आलोचना समेत गर्नुभयो ।

नेपाल तरुण दलको ६५ औं स्थापना दिवसको अवसरमा पार्टी कार्यालय सानेपामा आज शनिबार भएको कार्यक्रममा सभपाति देउवाले भन्नुभयो– ‘यतिका दिनसम्म किन हत्यारा पत्ता लागेन र किन कारबाही गरिएन यसको जवाफ अब सरकारले दिनै पर्दछ ।

कार्यक्रममा पूर्व प्रधानमन्त्री समेत रहेका सभापतिदेउवाले नेपाल तरुण दललाई देशव्यापी रुपमा संगठन विस्तार गर्न निर्देशन समेत दिनुभयो ।कार्यक्रममा कांग्रेस नेताहरुले तरुण दललाई प्रभावकारी रुपमा अघि बढाउन सुझाव दिएका थिए ।

तरुण दलका सभापति जीतजंग बस्नेतले पार्टीको निर्देशन अनुसार जनताको भलाइकालागि जस्तोसुकै जिम्मेवारी दिए पनि पूरा गर्ने प्रतिवद्धता व्यक्त गर्नुभएको थियो । वि.सं २०१०सालमा बीपी कोइरालाले तरुण दल स्थापना गरेको सम्झनामा तरुण दलले स्थापना दिवस मनाएको हो।