नेकपा स्थायी कमिटी बैठक: वार्ता नै भूमि फिर्ता ल्याउने माध्यम

काठमाण्डाैंः नेपाल कम्युनिस्ट पार्टी (नेकपा) का विभिन्न नेताले भारतद्वारा अतिक्रमित भूूमि फिर्ता ल्याउन राष्ट्रिय सहमतिका आधारमा वार्ता प्रक्रिया अगाडि बढाउन पार्टी तथा सरकारलाई सुझाव दिएका छन् ।

प्रधानमन्त्री निवासमा जारी नेकपाको स्थायी कमिटीमा शनिबार विभिन्न नेताले नेपाली भूूमि फिर्ता ल्याउन वार्ता गर्न सुझाव दिनुभएको पार्टीका प्रवक्ता एवं सचिवालय सदस्य नारायणकाजी श्रेष्ठले जानकारी दिए । नेकपाको स्थायी कमिटी बैठकमा नक्सा र सीमा विवादको कार्यसूचीमा छलफल भइरहेको छ ।

प्रवक्ता श्रेष्ठका अनुसार शनिबारको बैठकमा नेपालको सीमा समस्या र समाधानका बारेमा २१ नेताले आ-आफ्ना विचार व्यक्त गर्ने क्रममा नक्सा प्रकाशित गरेर संविधानको अनुसूचीमा समेत राखेको र राष्ट्रको सार्वभौमिकता, अखण्डता रक्षाका सम्बन्धमा सरकारले गरेको पहल कोसेढुङ्गा सावित भएको धारणा राखेको बताए ।

नेकपाका उपाध्यक्ष वामदेव गौतमले संविधान संशोधन गरी नक्सा अध्यावधि गरिसकेपछि वार्ता र छलफलको माध्यमबाट नेपालको भूमि भारतबाट फिर्ता ल्याउन सुुझाव दिनुुभयो । पार्टी र सरकारले नयाँ नक्सा बनाएर ऐतिहासिक काम गरेको बताउँदै उहाँले अबको काम भूमि फिर्ता र नेपाली भूमिबाट भारतीय सेना हटाउने कार्यसूची रहेको स्पष्ट पारेको खबर गोरखापत्रमा प्रमुखताका साथ छापिएको छ ।