एयर फ्रान्सले तेल अभिव र बेरुतका उडानहरू सोमबारसम्म निलम्बन गर्ने

काठमाण्डौं, ९ भदौः इजराइलले लेबनानमाथि हवाई आक्रमण सुरु गरेपछि एयर फ्रान्सले आइतबार र सोमबार तेल अभिव र बेरुतका लागि निर्धाति उडानहरू निलम्बन गरेको छ ।

फ्रान्सेली वाहक एयर फ्रान्सका प्रवक्ताले भन्नुभयो, “आज र भोलि उडानहरू निलम्बन गरिएका छन् ।” उहाँले मध्यपूर्वको अवस्थाको आधारमा निलम्बनलाई विस्तार गर्न सकिने बताउनुभयो ।

सामान्यतया दुवै सहरका लागि दैनिक सेवा सञ्चालन गर्ने एयर फ्रान्सले पहिला नै जुलाई २९ देखि अगस्ट १५ को बीचमा बेरुतका लागि उडानहरू रोकेको थियो तर तेल अभिवका लागि उडानहरू जारी राखेको छ ।

दुवै गन्तव्यमा सेवा दिने एयर फ्रान्सको सहायक कम्पनी ट्रान्सभियाले पनि आफ्ना उडानहरू रोकेको प्रवक्ताले जानकारी दिनुभयो ।

दुवै गन्तव्यका लागि सेवा पुनः सुरु गर्न सुरक्षा स्थितिको नयाँ आकलनको परिणाममा निर्भर रहने एयर फ्रान्सले बताएको छ ।

जर्मन एयरलाइन्स लुफ्थान्साले शुक्रबार उसको बेरुत उडानको निलम्बनलाई सेप्टेम्बरको अन्त्यसम्म बढाएको छ । एयरलाइन्सले सेप्टेम्बर २ सम्म तेल अभिव र तेहरानका लागि उडान नभर्ने बताएको छ ।