स्याङजामा तीन सुरक्षाकर्मी र १ जना चिकित्सकलाई कोरोना संक्रमण पुष्टि

काठमाण्डाैंः स्याङ्जामा तीन सुरक्षकर्मी र १ जना स्वास्थ्यकर्मीलाई कोरोना संक्रमण पुष्टि भएको छ ।

मंगलबार जिल्ला प्रहरी कार्यालय स्याङ्जाका ३ जना सुरक्षकर्मीमा कोरोना पोजेटिभ देखिएपछि सर्वसाधारण तथा सेवाग्राहीलाई जिल्ला प्रहरी कार्यालय प्रवेशमा रोक लगाइएको छ ।

सेवाग्राहीलाई सतर्क रहन समेत आग्रह गरिएको जनाउँदै जिल्ला प्रहरी कार्यालय स्याङ्जाले सेवाग्राहीलाई कार्यालय प्रवेशमा रोक लगाएको छ ।

सेवाग्राहीले निवेदन वा जाहेरी दिनुपरेमा विद्युतीय माध्यमको प्रयोग गर्न समेत आग्रह गरिएको प्रहरी नायब उपरीक्षक राजेन्द्र अधिकारीले जानकारी दिए ।

यसैगरी गल्याङ नगर अस्पतालमा सेवारत चिकित्सकमा कोरोना संक्रमण देखिएको छ। चिकित्सकमै कोरोना संक्रमण पुष्टि भएसँगै अस्पतालका सबै सेवाहरु बन्द गरिएका छन् ।

अस्पतालको आइसोलेसनका संक्रमितको उपचारमा खटिएका डाक्टर नै कोरोना संक्रमित भएका हुन् । क्षयरोग केन्द्र, पोखरामा भएको परीक्षणमा अस्पतालका डाक्टरमा कोरोना भाइरस संक्रमण पुष्टि भएको प्रादेशिक स्वास्थ्य निर्देशनालयले जनाएको छ। पुष्टि भएसँगै उनलाई आइसोलेसनमा राखिएको छ।

डाक्टरमा नै संक्रमण पुष्टि भएको खबरले समुदायमा फैलने डर स्थानीयको छ। डाक्टरले गल्याङ अस्पतालसहित क्लिनिकमा समेत स्वास्थ्य परीक्षण गर्ने जनाइएको छ।