प्रतिवादीले इजलासमै मर्ने अभिव्यक्ति दिएपछि बहस नै स्थगित

पोखरा । कास्की जिल्ला अदालत इजलासमा मंगलबार थुनछेक बहस चल्दै गर्दा प्रतिवादी एक्कासि रुन थालेपछि कार्यालय समयअगावै बहस स्थगित गरिएको छ ।

पोखराको सूर्यदर्शन सहकारीको रकम अपचलन अभियोगमा हिरासतमा रहेका ८० वर्षीय प्रतिवादी कृष्णबहादुर गुरुङले आफू ‘यहीँ मर्न सक्ने’ अभिव्यक्ति दिए । सोक्रममा उनकी छोरी पूर्वसांसद मीना गुरुङसमेत रुन थालिन् । वातावरणमा सन्नाटा छायो र बहस स्थगित भयो ।

पोखरा महानगरपालिका–१२ रानीपौवा निवासी कृष्णबहादुर बेलायती पूर्वसैनिक हुन् । कृष्णबहादुर र मीना गुरुङ दुवैलाई सहकारी ठगी अभियोगमा प्रतिवादी बनाइएपछि उनीहरू कास्की प्रहरी हिरासतमा छन् ।

हाल हिरासतमा रहेका सात जना प्रतिवादीमध्ये सूर्यदर्शन सहकारीकी पूर्वकोषाध्यक्ष आरती गुरुङको मात्र बयान बाँकी रहेकामा मंगलबार उनको बयान लिइएको थियो । दिउँसो २ बजेसम्म उनको बयान सकिएपछि खाजापछि थुनछेक बहस सुरु भयो ।

यत्तिकैमा जिल्ला सरकारी वकिल कार्यालय कास्कीका जिल्ला सहायक न्यायाधिवक्ता शान्तिदेवी शर्माले प्रतिवादीहरूको नाम लिनेक्रममा कृष्णबहादुर गुरुङको पनि नाम आयो । बिनाकारण आफूलाई प्रतिवादी बनाइएपछि ८० वर्षीय ज्येष्ठ नागरिक कृष्णबहादुरले आँसु झार्दै आफू निर्दोष रहेको बिलौना गरे । उनले आफू इजलासमै मर्न सक्ने बताए । बाबु–छोरी एक्कासि रुवावासी गर्न थालेपछि कार्यालय समय नसकिँदै प्रतिवादीहरूका तर्फबाट थुनछेक बहस स्थगित गरिएको थियो ।

मुटुका बिरामी कृष्णबहादुर अस्पतालमा उपचाररत छन् । उनकी छोरी ६३ वर्षीया मीना गुरुङ २०७४ सालको प्रदेशसभा निर्वाचनमा एमालेबाट समानुपातिक सांसद हुन् । भूपू गोर्खाको परिवारमा हुर्के बढेकी वरिष्ठ सौन्दर्यकर्मीसमेत रहेकी मीना सहकारीकी पूर्वउपाध्यक्ष हुन् । उनलाई गत ९ पुसमा कास्की प्रहरीले उनकै निवास पोखरा महानगरपालिका–१२ रानीपौवाबाट नियन्त्रणमा लिएको थियो । हालै मात्रै बेलायतबाट पोखरा आएका उनका बाबु त्यसअघि नै पक्राउ परिसकेका थिए ।

२०६५ सालमा पोखरामा सूर्यदर्शन सहकारी खोल्दा ज्ञानबहादुर बमजनलगायतको अनुरोधमा तदर्थ समितिमा रहेकी मीना पछि उपाध्यक्षको भूमिकामा थिइन् । सो सहकारीमा पछि जोडिएका गीतेन्द्रबाबु (जीबी) राईलगायतका व्यक्तिहरूले रकम खाने पचाउने नियत राखेपछि उनले तत्कालै सहकारी रजिस्ट्रार कार्यालयमा राजीनामा बुझाएर बाहिरिएकी थिइन् ।

सूर्यदर्शन सहकारीको ठगी प्रकरणमा प्रतिवादी बनाइएका उनीसहित ज्ञानबहादुर बमजन, सूर्यध्वज न्यौपाने, आरती गुरुङ, पेशलकुमार राई, कृष्णबहादुर गुरुङ, लीलाबहादुर गुरुङ, शकुन्तला गुरुङ, मिश्रकुमारी गुरुङ र रीतु गुरुङको प्रहरी अनुसन्धानमा ५३ लाख ७६ हजार रुपैयाँ दायित्व कायम हुने देखाइएको छ ।

त्यसो त, सहकारी ठगीसहित संगठित अपराध र सम्पत्ति शुद्धीकरणसमेतका मुद्दामा हालसम्म कुल ६३ प्रतिवादी कायम गरिएको छ । तीनवटै मुद्दा खेपिरहेका पूर्वगृहमन्त्री एवं रास्वपा सभापति रवि लामिछाने गत २ कात्तिक र गोर्खा मिडियाका पूर्वसञ्चालक पूर्वडीआईजी छविलाल जोशी गत ६ असोजमा पक्राउ परेका हुन् ।

रवि, जीबीसमेत गुल्मी मुसिकोट नगरपालिका–४ की लीला पछाईं, रामबहादुर खनाल, कृष्णबहादुर गुरुङ, पूर्वसांसद मीना गुरुङ र आरती गुरुङ गरी सात जना प्रतिवादीको बयान मंगलबार सकिएपछि थुनछेक बहस सुरु भएको छ ।

अब यही शुक्रबारसम्म थुनछेक बहस सक्ने कास्की जिल्ला अदालतको तयारी छ । यससँगै प्रतिवादीहरूलाई तीनमध्ये एक आदेश हुनेछ । न्यायाधीश नीतिज राईको इजलासले प्रतिवादीहरूलाई पुर्पक्षका लागि थुनामा पठाउने, धरौटी वा साधारण तारेखमा रिहामध्ये एक आदेश दिनेछ ।

गत वर्ष १८ असोजमा सूर्यदर्शन सहकारीका संस्थापक अध्यक्ष जीबी राईसमेत १९ जनालाई प्रतिवादी बनाएर कास्की जिल्ला अदालतमा सहकारी ठगी मुद्दा दायर भएको थियो ।

कास्की प्रहरीको पछिल्लो अनुसन्धान प्रतिवेदनसँगै जिल्ला सरकारी वकिल कार्यालय कास्कीले सोही मूल मुद्दामा थप प्रतिवादी बनाई पूरक अभियोगपत्र दायर गरेको हो । दायर पूरक अभियोगपत्रमा रास्वपा सभापति लामिछाने, पूर्वडीआईजी जोशीसहित ४४ जनालाई प्रतिवादी बनाइएको छ । तीमध्ये ३१ जना व्यक्ति, ८ कम्पनी छन् । अन्य ५ जनाको सम्पत्ति जफत गर्न थप अभियोजन दर्ता गरिएको छ । उनीहरूविरुद्ध १ अर्ब ५१ करोड ४० लाख १९ हजार १ सय ९४ रुपैयाँ ३ पैसा बिगो माग दाबी कायम गरिएको छ । आजको राजधानीबाट