कांग्रेसको आगामी महाधिवेशन ०८३ मंसिरदेखि माघभित्र सम्पन्न हुन्छ : नैनसिंह महर (अन्तवार्ता)

कांग्रेस केन्द्रीय समितिको बैठक बस्न किन ढिलाइ भइरहेको हो ? 

लामो समयदेखि कांग्रेस केन्द्रीय समितिको बैठक बस्न सकिरहेको छैन । यसले लोकतान्त्रिक पार्टीको लोकतान्त्रिक चरित्रमाथि नै असर पारिरहेको छ । केन्द्रीय समितिबाट हुनुपर्ने निर्णय पार्टी पदाधिकारी र कार्य सम्पादन समितिबाट हुँदा त्यसले केन्द्रीय कार्य समितिमाथि नै धावा बोलिरहेको अवस्था छ । यसले राम्रो सन्देश प्रवाह गरिरहेको छैन ।

नेतृत्वले केन्द्रीय सदस्यहरूबाट आउने प्रश्न छल्न खोजेको त होइन ?

१० महिनापछि पार्टीको १५औँ महाधिवेशन हुँदै छ । तर, त्यसका लागि गर्नुपर्ने सक्रिय सदस्यता वितरण निकै सुस्त छ । आफू आगामी महाधिवेशनमा पार्टी नेतृत्व या पदाधिकारीमा उठ्ने दाबी गर्ने नेताहरूकै गृहजिल्ला या निर्वाचन क्षेत्रमा समेत विवाद छ । त्यसलाई टुंग्याउन खासै पहल भएको देखिन्न । केन्द्रीय कार्यालयमा पार्टी नेतृत्व र पदाधिकारीको उपस्थिति पनि उत्साहजनक देखिन्न । पार्टीको सयदिने अभियानमा सरकारमा कांग्रेसले आफ्नो ओजअनुसार भूमिका निभाउन नसकेको र सरकार जनजीविकाका सवालमा धेरै ठाउँमा चुकेको प्रश्न उठेको छ । यस्ता प्रश्नको जवाफ नेतृत्वले छल्न खोज्दैमा कसरी छलिएला र ?

१५औँ महाधिवेशनको मितिबारे पनि फरक फरक धारणा आइरहेको छ नि ?

कांग्रेसको इतिहास र परम्पराअनुसार चारवर्षे केन्द्रीय समितिको पदावधि एक वर्ष विधानतः थप्न मिल्छ । त्यसपछि विशेष परिस्थितिमा थप ६ महिना थप्न सकिन्छ । त्यसबाहेक थप समयको कल्पना गर्न सकिन्न । कांग्रेसजस्तो लोकतान्त्रिक पार्टीले समयमै महाधिवेशन गराएन भने ऊ र अन्य कम्युनिस्ट पार्टीबीच के नै भिन्नता भयो र ? फेरि लोकतन्त्रका लागि लामो संघर्ष गर्नुभएका वर्तमान सभापति पनि महाधिवेशन सार्ने सोचमा हुनुहुन्छ जस्तो लाग्दैन । त्यसैले, कांग्रेसको आगामी महाधिवेशन ०८३ मंसिरदेखि माघभित्र सम्पन्न हुन्छ । नयाँपत्रिका