विश्वकप छनोट खेल : फ्रान्सले अजरवैजानलाई ३–० ले हरायो

पेरिस, असोज २६ गते । गोलीगाँठोको चोटले समस्यामा परेको किलियन एमबापेले गोल गरेपछि विश्वकप छनोटमा फ्रान्सले शुक्रबार राति अजरवैजानलाई ३–० ले हराएको छ । एमबापे सहयोगीको भूमिका निर्वाह गरेर दोस्रो गोलमा पनि संलग्न हुनुभयो । फ्रान्सका लागि अन्य दुई गोल एड्रियन राबियोट र स्थानापन्न खेलाडी फ्लोरिन थाउभिनले गर्नुभयो ।

खेलको ८३ औँ मिनेटमा गोलीगाँठोमा चोट लागेपछि एमबापे मैदानबाट बाहिरिनुभएको थियो । एमबापेले आफ्नो देश र क्लब रियल म्याड्रिडबाट खेलेर लगातार दस खेलमा गोल गर्नुभएको छ । फ्रान्सका लागि सर्वाधिक गोल गर्नेको सूचीमा एमबापे ५३ गोलसहित दोस्रो स्थानमा हुनुहुन्छ । ओलिभर जिरु (५७ गोल) ले मात्र फ्रान्सको जर्सीमा एमबापेलेभन्दा धेरै गोल गर्नुभएको छ ।

विश्वकप छनोटमा फ्रान्सले तीनै खेलमा जित हासिल गरेको छ । समूह ‘डी’ मा नौ अङ्कसहित फ्रान्स शीर्ष स्थानमा रहेको छ । सोही राति आइसल्यान्डमा ५–३ ले खेल जित्ने युक्रेन दोस्रो स्थानमा छ । युक्रेन पनि पाँच अङ्कले फ्रान्सभन्दा पछाडि छ ।

अर्को खेलमा जर्मनीले पनि लक्जेम्वर्गलाई सजिलै ४–० ले पराजित ग¥यो । गत महिना स्लोभाकियासँग हारेपछि विश्वकप छनोटको समूह ‘ए’ मा जर्मनीले खराब सुरुवात गरेको थियो । लक्जेम्वर्गसँगको जितपछि जर्मनी गोलअन्तरले शीर्ष स्थान बनाउन सफल भएको छ । जर्मनीका लागि जोसुआ किमिचले दुई गोल गर्नुभयो । खेलको २० औँ मिनेटमा लक्जेम्वर्गका डिफेन्डर डर्क कार्लसनले रातो कार्ड पाएपछि पनि जर्मनीलाई खेल सहज भएको हो । सोही समूहमा उत्तरी आयरल्यान्डले स्लोभाकियालाई २–० ले हरायो ।

बेल्जियम भने उत्तरी मासिडोनियासँग गोलरहित बराबरीमा रोकियो । समूह जे अन्तर्गत भएको खेलमा बेल्जियमले विपक्षीको गोलपोस्टमा २५ पटक निशाना बनाएर पनि गोल गर्न सकेन । यस नतिजापछि नर्थन मेसिडोनयाले बेल्जियमलाई एक अङ्कले पछाडि पारेर शीर्ष स्थान बनाएको छ । सोही समूह अन्तर्गत भएको अर्को खेलमा काजकस्तानले लिख्टेन्स्टाइनलाई ४–० ले निराश बनायो ।

समूह ‘बी’ मा स्विट्जरल्यान्डले शतप्रतिशत जितको नतिजा निकाल्ने क्रममा स्विडेनलाई २–० ले हरायो । तीन खेलमा जित हात पारेको स्विट्जरल्यान्डले अहिलेसम्म गोल बेहोरेको छैन । एपी