भेनेजुएलाको आरोप-आइसिसी जिम्मेवारीबाट पन्छियो

काराकास । अन्तर्राष्ट्रिय फौजदारी अदालत (आइसिसी)ले काराकासस्थित आफ्नो कार्यालय बन्द गर्ने निर्णय गरेपछि भेनेजुएलाका अधिकारीले आइसिसीलाई कर्तव्यबाट पन्छिएको आरोप लगाएका छन् ।

अदालतले वास्तविक प्रगति नभएको भन्दै उक्त कार्यालय बन्द गर्ने घोषणा गरेको थियो । आइसिसीले सन् २०२४ मा भेनेजुएलाका अधिकारीसँग सहकार्य गर्दै सन् २०१७ को विरोध प्रदर्शनका क्रममा दक्षिण अमेरिकी देशमा गरिएको मानवताविरुद्धका सम्भावित अपराधको अनुसन्धान गर्न काराकासमा कार्यालय स्थापना गरेको थियो ।

आइसिसीका उप-अभियोजक मामे मन्डिए नियाङले भेनेजुएला सरकारसँगको काममा अपेक्षित प्रगति नदेखिएका कारण कार्यालय बन्द गरिएको तर अनुसन्धान भने निरन्तर जारी रहने जानकारी दिनुभएको छ । भेनेजुएलाका अधिकारीले एक विज्ञप्ति जारी गरी आइसिसीले ‘थोरै मात्र पनि प्रतिबद्धता वा सहयोगको भावना नदेखाएको’ आरोप लगाएका छन् ।

उनीहरूले अदालतले भेनेजुएलाका विभिन्न पहलमा कुनै योगदान वा सुझाव नदिएको र आफूले ग्रहण गरेको जिम्मेवारीबाट ‘गैरजिम्मेवार रूपमा टाढा रहेको’ दाबी गरेका छन् । साथै, आइसिसीमाथि ‘राजनीतिक उद्देश्यका लागि न्यायलाई उपकरण बनाउने’ प्रयासमा कुनै कदम नचालेको आरोप पनि लगाइएको छ ।

अर्जेन्टिना, कोलम्बिया, चिली, प्याराग्वे, पेरु र क्यानडाले सन् २०१८ मै भेनेजुएलामाथि मानव अधिकार उल्लङ्घनको आरोपसहित आइसिसीमा उजुरी दर्ता गराएका थिए । त्यसपछि सन् २०२१ को नोभेम्बरमा राष्ट्रपति निकोलस मदुरोसँगको सम्झौताअनुसार आइसिसीलाई भेनेजुएलामा औपचारिक रूपमा काम गर्न अनुमतिपत्र प्रदान गरिएको थियो ।

सन् २००२ मा स्थापित आइसिसी विश्वको एक मात्र स्वतन्त्र अन्तर्राष्ट्रिय अदालत हो, जसले नरसंहार, युद्ध अपराध तथा मानवताविरुद्धका गम्भीर अपराधको अनुसन्धान र कारबाहीमा समर्पित छ । रासस/एएफपी