रोजगारीको प्रलोभन देखाएर भारत लैजाने २ एजेन्ट पक्राउ, ५४ जनाको उद्धार

काठमाण्डाैंः गैरकानुनी बाटोबाट बाँकेको नेपालगञ्ज हुँदै भारततिर लैजान लागिएका ५४ जनालाई प्रहरीले नियन्त्रणमा लिएको छ । उनीहरूलाई भारत लैजाने जिम्मा लिएका दुई जना युवालाई पनि प्रहरीले पक्राउ गरेको छ । पक्राउ पर्नेमा नेपालगन्ज १३ का सरोज हैयम राई र तुलसीपुर ८ का अम्बर गन्दर्व रहेको प्रहरीले जनाएको छ ।

भारतमा काम लगाइदिने भन्दै रुकुम, दैलेख, बर्दिया, बाँके लगायत जिल्लाबाट स्थानीयलाई भारत लैजान लागेका प्रहरी उपरीक्षक ओम रानाले जानकारि दिए । नाकानजिक डुडुवा गाउँपालिका १ को स्कुलमा राखेको अवस्थामा उनीहरूलाई उद्धार गरिएको हो । उद्धार गरिएकामा ४९ पुरुष र ५ महिला छन् ।

भारतमा रोजगारी लगाइदिने बहानामा उनीहरूले प्रत्येक व्यक्तिबाट ८ हजार रुपैयाँसम्म लिएका थिए । कोरोना भाइरस संक्रमणका कारण अहिले काम बिहीन भएकाहरु कोरोना जाखिमकै बीच पनि भारत गइरहेका छन् । अहिले भारतबाट आउनेहरुको तुलनामा जानेहरुको संख्या अत्याधिक रहेको छ ।