नेकपाका केन्द्रीय सदस्यहरूले आज शपथ लिँदै

काठमाडौं, पुस २९ । नेपाली कम्युनिस्ट पार्टी (नेकपा)का केन्द्रीय सदस्यहरूले आज औपचारिक रूपमा शपथ ग्रहण गर्दै छन्। पार्टी केन्द्रीय कार्यालय पेरिसडाँडामा दिउँसो १ः३० बजे शपथ ग्रहण कार्यक्रम तय गरिएको छ।

पार्टी संयोजक पुष्पकमल दाहाल ‘प्रचण्ड’को सचिवालयका अनुसार पछिल्लो समय विभिन्न समूह तथा धारबाट एकतामा जोडिएपछि थपिएका केन्द्रीय सदस्यहरूलाई आज शपथ गराउन लागिएको हो। शपथपछि उनीहरूले पार्टीको केन्द्रीय समितिमा औपचारिक जिम्मेवारी सम्हाल्नेछन्।

पार्टी एकतालाई सुदृढ बनाउने तथा संगठनात्मक संरचनालाई पूर्णता दिने उद्देश्यका साथ केन्द्रीय सदस्यहरूको शपथ कार्यक्रम आयोजना गरिएको नेकपाले जनाएको छ। शपथ ग्रहण कार्यक्रमपछि पार्टीको आगामी राजनीतिक कार्यदिशा, संगठन विस्तार तथा समसामयिक राजनीतिक परिस्थितिबारे समेत आन्तरिक छलफल हुने बताइएको छ।

नेकपाले हाल पार्टी एकता सुदृढीकरण, जनसंगठन परिचालन र आगामी राजनीतिक गतिविधिमा सक्रियता बढाउने तयारी गरिरहेको छ।