काठमाण्डौं । बेलायतका प्रधानमन्त्री किर स्टार्मरले मङ्गलबार राति चीन र जापान प्रस्थान गर्नुहुने उहाँका प्रवक्ताले सोमबार पुष्टि गरेका छन् । यो सन् २०१८ पछि बेलायती प्रधानमन्त्रीको बेइजिङको पहिलो आधिकारिक भ्रमण हुनेछ ।
डाउनिङ स्ट्रिटका प्रवक्ताका अनुसार उहाँ मङ्गलबार राति चीन र जापानको यात्राका लागि प्रस्थान गर्नुहुनेछन । अघिल्लो कन्जर्भेटिभ सरकारले लन्डन र बेइजिङबीचको सम्बन्धलाई नयाँ तल्लो तहमा पुर्याएको थियो । यसै सन्दर्भमा, स्टार्मरको भ्रमण मुख्यतः चीनसँगको आर्थिक सम्बन्ध पुनःस्थापित गर्ने महत्त्वाकांक्षामा केन्द्रित हुनेछ ।
बेलायती सरकारले लन्डनको केन्द्रमा २० हजार वर्गमिटर क्षेत्रफलमा ‘मेगा–दूतावास’ निर्माणको अनुमति दिएको केही दिनमै यो यात्रा घोषणा भएको हो । उक्त दूतावास बेलायतको सबैभन्दा ठूलो बन्ने तयारीमा छ, तर कानूनी चुनौती र स्थानीय विरोध प्रदर्शन अझै जारी रहने सम्भावना छ ।
गत महिनामा स्टार्मरले चीनले आर्थिक अवसर प्रदान गर्दा पनि राष्ट्रिय सुरक्षाको दृष्टिले जोखिम रहेको स्वीकार गर्नुभयो । सुरक्षा मन्त्री डान जार्विसले पनि चीनले राष्ट्रिय सुरक्षाका लागि खतरा जारी राख्ने बताउनुभएको छ ।
भ्रमणका क्रममा बेलायती नेताले ब्रिटिस स्टिलको चिनियाँ स्वामित्वसम्बन्धी विषय जस्ता व्यापार, लगानी र अन्य महत्त्वपूर्ण मुद्दा उठाउने अपेक्षा गरिएको छ । सरकारी प्रवक्ताले गुप्तचर एजेन्सीहरूले सुरक्षा जोखिम व्यवस्थापनका लागि उपायहरू विकास गर्न मद्दत गरेको जानकारी दिनुभयो ।
स्टार्मरको भ्रमणले दुई देशबीचको व्यापार, लगानी र सुरक्षा सम्बन्धलाई सुदृढ गर्ने प्रयासको सङ्केत गर्ने अपेक्षा गरिएको छ । रासस/एएफपी
युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया