कम्बोडियामा अलपत्र परेका २० नेपालीको उद्धार

दूतावासको पहल र कम्बोडियाको सरकारको सहयोगमा उनीहरूलाई उद्धार

युग खबर २०८२ चैत्र ६, शुक्रबार

शेयर गर्नुहोस:

फन्ट परिवर्तन गर्नुहोस: अ अ अ

काठमाडौँ । कम्बोडियामा विभिन्न कारणले अलपत्र परेका २० नेपालीको उद्धार गरी स्वदेश फर्काइएको छ ।

विभिन्न प्रलोभनमा परेर कम्बोडिया पुगेका उनीहरूलाई थाइल्याण्डको बैंककस्थित नेपाली दूतावासले उद्धार गरेको हो ।

दूतावासका अनुसार उद्धार गरिएकाहरू अनलाइन स्क्यामिङ केन्द्रहरू, अनलाइन ठगी गर्ने क्यासिनोहरू र अन्य विभिन्न गैरकानुनी काममा लगाइएका र विनाभिसा बसिरहेका व्यक्तिहरू हुन् ।

दूतावासको पहल र कम्बोडियाको सरकारको सहयोगमा उनीहरूलाई उद्धार गरिएको हो । उद्धार गरिएकाहरूलाई गैरआवाशीय नेपाली संघ, कम्बोडियाको सहजीकरणमा बुधबार नै काठमाडौं पठाइएको छ । उनीहरू शुक्रबार त्रिभुवन विमानस्थलमा अवतरण भएका छन् ।

अलपत्र परेका अन्य व्यक्तिहरू पनि रहेको सूचना प्राप्त भएको र उनीहरूलाई पनि फर्काउन पहल भइरहेको दूतावासले जानकारी दिएको छ ।

कम्बोडियाको पर्यटनसम्बन्धी तथ्यांक अनुसार पछिल्लो समय सन् २०२१ मा १०१ जना नेपालीहरू भ्रमण भिसामा कम्बोडिया गएकोमा सन् २०२२ मा १९७७ जना, सन् २०२३ मा २९४० जना, सन् २०२४ मा ६, ४०४ जना तथा सन् २०२५ मा ९, ६७ जना नेपालीहरू कम्बोडिया पुगेका छन् ।

दूतावासले कुनै प्रलोभनमा नपरी नेपाल सरकारले तोकेका मापदण्ड बमोजिम श्रम स्वीकृति लिएर मात्र कम्बोडिया, लाओस्, म्यानमार थाइल्यान्डलगायतका मुलुकहरूमा नजान सचेत गराएको छ ।