परशुराम नगरपालिकाको घोषणा : ७ पहाडी जिल्लाका विद्यार्थीलाई विज्ञान पढ्न पूर्ण छात्रवृत्ति

डडेल्धुरा । परशुराम नगरपालिकाले प्रदेशका ७ पहाडी जिल्लाका विद्यार्थीहरूका लागि विज्ञान संकायमा ३० जनाका लागि पूर्ण छात्रवृत्ति व्यवस्था गरेको छ।

नगर शिक्षा समितिको गत निर्णयअनुसार नगरपालिकाले यस वर्षका लागि यस्तो घोषणा गरेको हो। नगरपालिकाले एक सूचना जारी गर्दै डडेल्धुरासहित दार्चुला, बैतडी, बझाङ, अछाम, बाजुरा र डोटी जिल्लाका स्थानीय तहमा स्थायी बसोबासी विद्यार्थीलाई लक्षित गरी यो छात्रवृत्ति कार्यक्रम ल्याएको जनाएको छ।

नगरपालिकाका अनुसार परशुराम नगरपालिकाभित्र सञ्चालित विद्यालयहरूमा कक्षा ११ र १२ मा विज्ञान संकाय अध्ययन गर्न चाहने ३० जना जेहेन्दार विद्यार्थीले यो सुविधा पाउनेछन्।

छात्रवृत्तिका लागि आर्थिक रूपमा विपन्न, कमजोर तथा जेहेन्दार विद्यार्थीहरूलाई प्राथमिकता दिइने नगरपालिकाले जनाएको छ।

मेयर भरत बडायर जोशीद्वारा हस्ताक्षरित सूचनामा सम्बन्धित जिल्लाका स्थानीय तहहरूलाई समेत आफ्नो क्षेत्रबाट अध्ययन गर्न इच्छुक विद्यार्थी छनोट गरी पठाइदिन अनुरोध गरिएको छ।

नगरपालिकाको यो कदमले सुदूरपश्चिमका विकट पहाडी क्षेत्रका जेहेन्दार तर आर्थिक अभाव झेलिरहेका विद्यार्थीहरूलाई विज्ञान विषय पढ्ने अवसर प्रदान गर्ने विश्वास मेयरले लिएका छन् ।