एमाले उपाध्यक्ष पौडेलविरुद्ध फेरि ५ दिन म्याद थप

काठमाडौं । नेकपा एमालेका उपाध्यक्ष विष्णु पौडेल विरुद्ध सम्पत्ति शुद्धीकरण (मनी लाउन्डरिङ) सम्बन्धी मुद्दामा अनुसन्धान जारी राख्न विशेष अदालतले पुनः पाँच दिनको म्याद थप गरेको छ। विशेष अदालतका न्यायाधीश नारायण प्रसाद पौडेल र विदुर कोइराला को संयुक्त इजलासले बुधबार अनुसन्धानका लागि थप पाँच दिन हिरासतमा राख्न अनुमति दिएको हो।

योसँगै पौडेलविरुद्ध अदालतबाट चौथो पटक म्याद थप भएको छ। सम्पत्ति शुद्धीकरण अनुसन्धान विभागले उनलाई असार ८ गते सुर्खेतबाट पक्राउ गरी थप अनुसन्धानका लागि काठमाडौं ल्याएको थियो। विभागले उनीमाथि अवैध सम्पत्ति आर्जन तथा त्यसको स्रोत लुकाउने उद्देश्यले सम्पत्ति शुद्धीकरण गरेको आशंकामा अनुसन्धान अघि बढाइरहेको जनाएको छ।

अनुसन्धानका क्रममा आर्थिक कारोबार, बैंक विवरण, सम्पत्तिको स्रोत, लगानी र अन्य वित्तीय गतिविधिसम्बन्धी कागजात संकलन तथा विश्लेषण भइरहेको जनाइएको छ। अनुसन्धान नसकिएकाले विभागले थप समय मागेको थियो, जसअनुसार विशेष अदालतले पाँच दिनको म्याद थप्ने आदेश दिएको हो।

यसअघि पौडेलकी पत्नी दोमाया पौडेल ले आफ्ना श्रीमान्लाई गैरकानुनी रूपमा थुनामा राखिएको दाबी गर्दै सर्वोच्च अदालतमा बन्दी प्रत्यक्षीकरण (हाबियस कर्पस) रिट दायर गरेकी थिइन्। तर सर्वोच्च अदालतले असार १८ गते उक्त रिट खारेज गर्दै पक्राउ र हिरासत प्रक्रिया कानुनअनुसार भएको ठहर गरेको थियो।

सम्पत्ति शुद्धीकरण अनुसन्धान विभागले आवश्यक प्रमाण संकलन तथा अनुसन्धान पूरा भएपछि मुद्दा दर्ता गर्ने वा नगर्नेबारे निर्णय गर्ने जनाएको छ। त्यसअघि अदालतले दिएको म्यादभित्र अनुसन्धान प्रक्रिया निरन्तर अघि बढाइनेछ।