रास्वपाको ‘नीति, संगठन र नेतृत्व’ मन्थन कार्यशाला सुरु

काठमाडौं । राष्ट्रिय स्वतन्त्र पार्टी (रास्वपा) ले केन्द्रीय सदस्यहरूको क्षमता अभिवृद्धि तथा पार्टीको संगठन सुदृढीकरणका लागि आयोजना गरेको दुईदिने ‘नीति, संगठन र नेतृत्व’ कार्यशाला काठमाडौंमा सुरु गरेको छ।

‘रास्वपा कार्यशाला–नीति, संगठन र नेतृत्व, शृङ्खला–१’ नाम दिइएको कार्यक्रममा पार्टीको नीति, संगठन विस्तार, नेतृत्व विकास तथा आगामी राजनीतिक कार्यदिशाबारे छलफल भइरहेको संगठन विभाग प्रमुख प्रमोद न्यौपानेले जानकारी दिए।

कार्यशालाको पहिलो दिन अनिल चित्रकारले ‘नेपालको चित्र, हामी कहाँ छौँ ?’ विषयमा मुलुकको वर्तमान अवस्था प्रस्तुत गर्नेछन्। उपसभापति डा. स्वर्णिम वाग्लेले पार्टीको प्रस्तावना, सामाजिक लोकतन्त्र र त्यसका आधारबारे धारणा राख्ने कार्यक्रम छ।

त्यस्तै, महामन्त्री विपिनकुमार आचार्यले पार्टीका आधारभूत मूल्य–मान्यता तथा स्थानीय निर्वाचनका लागि उम्मेदवार छनोटको रूपरेखा प्रस्तुत गर्नेछन्। पूर्वसचिव सुरेन्द्र अर्यालले बजेट निर्माणको वैज्ञानिक प्रक्रियाबारे र उपसभापति सोविता गौतमले पार्टी र सरकारबीचको अन्तरसम्बन्ध, समस्या तथा समाधानका उपायबारे प्रस्तुति दिने कार्यक्रम रहेको छ।

कार्यशालाको दोस्रो दिन निवर्तमान महामन्त्री कवीन्द्र बुर्लाकोटीले पार्टीको संगठनात्मक संरचना, त्यसको सुदृढीकरण र केन्द्रीय सदस्यको भूमिकाबारे प्रस्तुति दिनेछन्। संगठन विभाग प्रमुख न्यौपानेले ‘मिडिया र सोसल मिडिया : कसरी प्रयोग गर्ने ?’ विषयमा प्रशिक्षण दिने कार्यक्रम रहेको रास्वपाले जनाएको छ।