मधेशलाई समृद्ध बनाउने समय आयो, द्वन्द्वमा नफस्न अमरेश सिंहको अपिल

काठमाडौँ : राष्ट्रिय स्वतन्त्र पार्टी (रास्वपा)का नेता तथा प्रतिनिधिसभा सदस्य डा. अमरेश कुमार सिंहले पटक–पटक हुने आन्दोलन, जातीय तथा धार्मिक हिंसाले मधेशको विकासमा गम्भीर असर पुर्‍याएको भन्दै अब यस्ता द्वन्द्वबाट मुक्त भएर विकास र समृद्धिको यात्रामा अघि बढ्नुपर्ने बताएका छन्।

सामाजिक सञ्जालमार्फत सार्वजनिक अपिल जारी गर्दै सांसद सिंहले अशान्ति र हिंसात्मक गतिविधिका कारण मधेशको आर्थिक, सामाजिक तथा शैक्षिक क्षेत्र प्रभावित भएको उल्लेख गरेका छन्। उनका अनुसार बारम्बारका आन्दोलन र द्वन्द्वले मधेशलाई कम्तीमा एक दशक पछाडि धकेलेको छ।

सिंहले हिंसात्मक गतिविधिका कारण भौतिक पूर्वाधारमा क्षति पुग्ने, विद्यालय तथा कलेजको शैक्षिक सत्र अवरुद्ध हुने, उद्योग–व्यवसाय प्रभावित हुने र लगानीको वातावरण कमजोर बन्ने जस्ता समस्या सिर्जना भएको बताएका छन्। उनले यस्तो अवस्थाले समग्र मधेशको विकास यात्रालाई नै ठूलो धक्का पुगेको उल्लेख गरेका छन्।

उनले अब सबै राजनीतिक दल, नागरिक समाज, युवा, बुद्धिजीवी तथा विभिन्न जाति, भाषा र धर्मका समुदायबीच आपसी विश्वास, सहकार्य र एकताको वातावरण निर्माण गर्दै विकासका साझा एजेन्डामा केन्द्रित हुनुपर्नेमा जोड दिएका छन्।

सिंहले सामाजिक सद्भाव, शान्ति र सहिष्णुतालाई बलियो बनाउँदै मधेशलाई आर्थिक, शैक्षिक र सामाजिक रूपमा समृद्ध बनाउने दिशामा सबै पक्षले जिम्मेवार भूमिका निर्वाह गर्नुपर्ने धारणा व्यक्त गरेका छन्।