सुनसरी घटनाको जिम्मेवारी लिन सरकार तयार छ ? : पदमा अर्याल

काठमाडौँ । नेकपा एमालेले सुनसरी घटनाको जिम्मेवारी लिन सरकार तयार छ कि छैन भन्ने प्रश्न उठाएको छ।

प्रतिनिधिसभाको बैठकमा बोल्दै एमाले सांसद पदमा अर्यालले सुनसरी घटना दुःखद भएको उल्लेख गर्दै शान्ति–सुरक्षा कायम गर्न सरकार असफल भएको आरोप लगाइन्।

उनले हिजो काठमाडौँमा गोली चलेको घटनामा तत्कालीन प्रधानमन्त्री र गृहमन्त्रीमाथि फौजदारी अभियोग लगाउने सरकारले सुनसरी घटनामा वर्तमान प्रधानमन्त्री र गृहमन्त्री जिम्मेवार हुन्छन् कि हुँदैनन्, उनीहरूको राजीनामा आउँछ कि आउँदैन भन्ने प्रश्न गरिन्।

सांसद अर्यालले संकटको समयमा प्रधानमन्त्रीले अग्रसर भएर नेतृत्व लिन नसकेको टिप्पणी गर्दै प्रधानमन्त्रीको पद सिंहदरबार सजाउनका लागि मात्र नभएको बताइन्।

विगतमा यस्ता घटना हुँदा तत्कालीन सरकारले समाजमा सद्भाव कायम गर्न पहल गरेको उल्लेख गर्दै उनले वर्तमान सरकारले त्यस किसिमको कुनै पहल नगरेको आरोप लगाइन्।

सांसद अर्यालले विपद् व्यवस्थापनलाई प्रभावकारी बनाउन पनि सरकारको ध्यानाकर्षण गराइन्।