अविरल वर्षाले बीपी राजमार्ग अवरुद्ध

काभ्रेपलाञ्चोक। अविरल वर्षाका कारण पहिरो जाँदा बीपी राजमार्ग अवरुद्ध भएको छ। आज बिहान ४:३० बजे बीपी राजमार्गअन्तर्गत रोशी गाउँपालिका-७ स्थित चारसयबेँसी र रोशी-८ गिम्दीमा पहिरो खस्दा सडक पूर्ण रूपमा अवरुद्ध भएको जिल्ला प्रहरी कार्यालयले जनाएको छ।

यसैबीच, जल तथा मौसम विज्ञान विभागको वर्षाको पूर्वानुमानलाई मध्यनजर गर्दै बिहीबारदेखि रातको समयमा बीपी राजमार्गअन्तर्गत काभ्रेपलाञ्चोक सडकखण्डमा सवारी सञ्चालन बन्द गरिएको छ।

जिल्ला प्रशासन कार्यालयले बाढीपहिरोको जोखिम र अवस्था हेरी दिउँसोको समयमा पनि सडक बन्द गर्न सकिने जनाएको छ। हाललाई भने असोज ८ गतेदेखि १२ गते बिहानसम्म साँझ ५:०० बजेदेखि बिहान ५:०० बजेसम्म सवारी आवागमनमा रोक लगाइएको प्रमुख जिल्ला अधिकारी गोपालकुमार अधिकारीले बताएका छन्।

वर्षा तथा बाढीपहिरोको अवस्था मूल्याङ्कन गरी दिउँसोसमेत सवारीसाधन सञ्चालनमा रोक लगाउनुपर्ने अवस्था देखिएमा जिल्ला प्रहरी कार्यालयले आवश्यक निर्णय लिनेछ। उक्त निर्णय कार्यान्वयनमा सहजीकरणका लागि छिमेकी जिल्ला सिन्धुली र भक्तपुरका प्रहरी युनिटहरूलाई अनुरोध गरिएको छ।

जिल्ला विपद् व्यवस्थापन समितिको बैठकले नदी किनार तथा पहिरोको जोखिममा रहेका बस्तीका नागरिकलाई सम्भावित जोखिमबारे सचेत गराउने, जोखिमसम्बन्धी सूचना निरन्तर प्रवाह गर्ने र स्थानीय सञ्चारमाध्यममार्फत सूचना सम्प्रेषण गर्ने निर्णय गरेको छ। प्रहरीले राजमार्गको अवस्था बुझेर मात्रै दिउँसोको समयमा यात्रा गर्न सर्वसाधारणलाई अनुरोध गरेको छ।