तीन जिल्लाका मुख्य सडक खण्ड प्रभावित

काठमाडौँ । बाढी तथा पहिरोका कारण गण्डकी र कर्णाली प्रदेशका विभिन्न मुख्य राजमार्गहरू प्रभावित भएका छन्।

सोमबार बिहान ६:३० बजेसम्म प्राप्त विवरण अनुसार म्याग्दी, गोरखा र सुर्खेत जिल्लाका सडक खण्डहरू बाढी र पहिरोका कारण अवरुद्ध तथा एकतर्फी सुचारु रहेका छन्।

गण्डकी प्रदेश अन्तर्गत म्याग्दी जिल्लाको रघुगंगा गाउँपालिका–२ बैसरीमा असोज १० गते बिहान ५:५० बजे गएको पहिरोका कारण बेनी–जोमसोम सडक खण्ड हाल एकतर्फी रूपमा सुचारु रहेको छ। यस्तै, गोरखा जिल्लाको आरुघाट गाउँपालिका–२, ३ र आरुघाट गाउँपालिका–९ नयाँपुलस्थित बाढीका कारण सोतीमा रहेको फलामको पुल र गोर्खा आरुघाटबाट धादिङ जोड्ने सडक असोज २५ गते बिहान ५:३० बजेदेखि पूर्ण रूपमा अवरुद्ध बनेको छ।

यसैगरी, कर्णाली प्रदेश अन्तर्गत सुर्खेत जिल्लाको बराहताल गाउँपालिका–७ औलिसेमा कात्तिक १ गते बिहान ५:४५ बजे गएको पहिरोका कारण कर्णाली राजमार्ग एकतर्फी रूपमा मात्र सुचारु रहेको प्रहरीले जनाएको छ। अवरुद्ध सडकहरू पूर्ण रूपमा सञ्चालनमा ल्याउन आवश्यक प्रयास भइरहेको छ।