एनपीएलमा लुम्बिनी लायन्सको लगातार तेस्रो जित, जनकपुर बोल्ट्स १६ रनले पराजित

काठमाडौँ । नेपाल प्रिमियर लिग (एनपीएल) अन्तर्गत बिहीबार भएको खेलमा लुम्बिनी लायन्सले जनकपुर बोल्ट्सलाई १६ रनले पराजित गरेको छ। जितसँगै लुम्बिनीले जारी प्रतियोगितामा आफ्नो अपराजित यात्रा कायमै राखेको छ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा लुम्बिनीले दिएको १५० रनको लक्ष्य पछ्याएको जनकपुरले निर्धारित २० ओभरमा ८ विकेट गुमाएर १३३ रन मात्र बनाउन सक्यो। जनकपुरका कप्तान हरमित सिंहले २० बलमा ३३ रन बनाए भने आदित्य महताले अविजित ३० रन जोडे। सैफ हसनले २८ तथा त्रितराज दासले १८ रन बनाए।

लुम्बिनीका बलर डार्सी शर्टले ४ ओभरमा २३ रन खर्चेर ३ विकेट लिए। तिलक भण्डारीले २ तथा शेर मल्लले पनि २ विकेट लिए भने रुबेन ट्रम्पेलम्यानले एक विकेट हात पारे।

यसअघि टस हारेर पहिले ब्याटिङ गरेको लुम्बिनीले निर्धारित २० ओभरमा ८ विकेट गुमाएर १४९ रन बनाएको थियो। कप्तान रोहित पौडेलले सर्वाधिक ३४ रन बनाए। निरोशन डिक्वेलाले २७, दिलीप नाथले २५ तथा आसिफ शेखले २१ रनको योगदान दिए।

यो जितसँगै लुम्बिनी चार खेलबाट सात अंकसहित अंकतालिकाको शीर्ष स्थानमा रहेको छ। लुम्बिनीले तीन खेल जितेको छ भने चितवन राइनोजविरुद्धको एक खेल वर्षाका कारण रद्द भएको थियो। जनकपुर भने पाँच खेलबाट चार अंकसहित चौथो स्थानमा छ।